Լաւրովի հետ հանդիպմանը Արաղչին ընդգծել է միջուկային էներգիայի եւ խաղաղ նպատակներով հարստացման Իրանի իրաւունքները
«ԱԼԻՔ» – ԱԳ նախարար Սէյէդ Աբբաս Արաղչին եւ ՌԴ արտգործնախարար Սերգէյ Լաւրովը Շանհայի համագործակցութեան կազմակերպութեան նախարարների խորհրդի նիստի շրջանակներում հանդիպել եւ քննարկել են տարածաշրջանային վերջին զարգացումների մասին:
Այս մասին տեղեկացնելով, իրանական ԶԼՄ-ները նշել են, որ ռուս գործընկերոջ հետ հանդիպման ժամանակ Արաղչին ընդգծել է Իրանի վճռականութիւնը՝ պաշտպանելու երկիրը հեղինակութիւնն ու Իրանի ժողովրդի օրինական իրաւունքները՝ պատասխանատւութեան ենթարկելով ագրեսորներին, ինչպէս նաեւ հետեւելու խաղաղ միջուկային ծրագրերին, այդ թւում՝ հարստացման գործընթացին։
Հանդիպմանը Լաւրովը վերահաստատելով իր երկրի դիրքորոշումը՝ դատապարտել է Իրանի դէմ ագրեսիան, մասնաւորապէս Իրանի խաղաղ միջուկային օբիեկտների դէմ անօրինական յարձակումները, եւ կարեւորել երկկողմ եւ բազմակողմ ջանքերը ու խորհրդակցութիւնները՝ տարածաշրջանում լարւածութիւնը կանխելու համար:
Նա նշել է, որ Մոսկւան պատրաստ է աջակցել միջազգային ֆորումներում, մասնաւորապէս՝ ՄԱԿ-ի Անվտանգութեան խորհրդի մակարդակով, առկայ խնդիրները լուծելու հարցում:
Միեւնոյն ժամանկ, երբ եւրոպական Տրոյկան սպառնում է ակտիւացնել «Յետադարձ մեխանիզմ»-ը, եթէ Իրանի միջուկային բանակցութիւնները դրական արդիւնքների չհասնեն, «Թասնիմ»-ը յղում անելով ռուսական Sputnik-ին, տեղեկացրել է, որ ԵՄ արտաքին քաղաքականութեան ղեկավար Կայա Կալասը (երեքշաբթի, յուլիսի 15-ին) յայտարարութիւն է տարածել, որտեղ նշւած է. «Դիւանագիտութիւնն է Իրանի հարցերը լուծելու լաւագոյն միջոցը: Իրանի հետ բանակցութիւնները պէտք է վերսկսւեն։ Եւրամիութիւնը պատրաստ է բանակցել Իրանի հետ»։
Փորձագիտական շրջանակները Տրոյկայի սպառնալից յայտարարութիւնները, ինչպէս եւ ԵՄ-ի պաշտօանակն խողովակով նման կոչերը, գնահատում են որպէս խաղից դուրս վիճակ, քանի որ փաստացի կերպով, ԱՄՆ-ն հին աշխարհամասին դուրս հրելով Իրանի հետ բանակցութիւններից, փորձում է վերահսկողութիւն սահմանել նաեւ նման գործընթացների վրայ, միանձնեայ բանակցութիւններ վարելով Իրանի հետ:
