«ԱԼԻՔ» – Յեղափոխութեան առաջնորդ այաթ. Սէյէդ Ալի Խամենէին կոչ է արել պատասխանատւութեան ենթարկել Իսրայէլին ու ԱՄՆ-ին Իրանի ժողովրդի դէմ իրականացրած 12-օրեայ յանցագործութիւնների համար:
Այաթ. Խամենէին երէկ՝ յուլիսի 16-ին, հանդիպել է դատական համակարգի բարձրաստիճան պաշտօնեաների եւ դատաւորների խմբի հետ:
Իր ելոյթում Գերագոյն առաջնորդն անդրադառնալով փաստին, որ տարբեր քաղաքական կողմնորոշումներ ունեցող իրանցիներն աջակցել են երկրին յանցաւոր սիոնիստական ռեժիմի եւ Միացեալ Նահանգների կողմից սանձազերծւած պատերազմի ժամանակ, ընդգծել է. «Միացեալ Նահանգները յանցակից է Իրանի ժողովրդի դԷմ 12-օրեայ պատերազմի յանցագործութիւններում: Իսկ ագրեսոր կողմը պէտք է միջազգային դատարաններում պատասխանատւութեան ենթարկւի իր յանցագործութիւնների համար»։
Նա յաւելել է, որ ագրեսիան սկսելուց կարճ ժամանակ անց Իսրայէլը հասկացել է, որ ի վիճակի չէ միայնակ դիմակայել Իրանին, ուստի կաշին փրկելու համար խնդրել է ԱՄՆ-ի միջամտութիւնը:
Յեղափոխութեան առաջնորդը նաեւ Իրանի հակահարւածն ԱՄՆ յարձակմանը անւանել է շատ հաշւարկւած հարւած՝ յաւելելով. «Իրանի կողմից յարձակման ենթարկւած այդ կենտրոնը տարածաշրջանում ԱՄՆ չափազանց զգայուն յենակէտ էր, եւ երբ լրատւական գրաքննութիւնը թեթեւացւի, պարզ կը դառնայ, թէ ինչ ծաւալների հարւած է հասցրել Իրանը։ Իհարկէ, սա այն մեծութեամբ չէ, ինչ Իրանը կարող է հարւածել Ամերիկային կամ ուրիշներին»:
Գերագոյն առաջնորդը յիշեցնելով այն փաստը, որ իրանցիներն ինքնաբուխ միաւորւեցին ու բարձրաձայնեցին երկիրը պաշտպանելու կարեւորութեան մասին, նշել է. «Կարող են ասել, որ խօսքը գործ չէ: Սակայն այդ խօսելու ոգին, այն ոգեւորւածութիւնը, որ մարդուն ստիպում է խօսել, ակնյայտ էր մեր ժողովրդի մօտ: Սա կարեւոր է։ Այս բոլոր մարդիկ՝ երբեմն հակադիր քաղաքական կողմնորոշումներով, բոլորովին տարբեր կրօնական կշիռներով, միասին կանգնեցին ու ստեղծեցին այս մեծ միասնութիւնը, ազգային այս մեծ միակամութիւնը, պահպանել է պահէք այդ հարստութիւնը, բոլորը պէտք է անեն դա, լրագրողները, դատաւորները,պետական պաշտօնեաները, հոգեւորականները, ուրբաթօրեայ իմամները: Բոլորիս վրայ է այս պարտականութիւնը: Այն քաղաքական ճաշակների ու տարբերութիւնների փաստի հետ հակասութեան մէջ չէ: Չի հակասում նոյնիսկ դաւանանքի ու հաւատքով տարբեր կշիռներ ունեցող անձանց ու տարբերութիւններին։ Սա միասին կանգնելն է՝ ճշմարիտը պաշտպանելու համար, սա երկրի պաշտպանութեան համար է, համակարգի պաշտպանութեան եւ սիրելի Իրանի պաշտպանութեան համար…»։
