Յակոբ Բադալեան. «Երեւանն ու Բաքուն կարող են ստորագրել տասնեակ թղթեր, բայց այդ թղթերի կենսունակութիւնը որոշողների շրջանակը այլ է»
«ԱԼԻՔ» – Քաղաքագէտ Յակոբ Բադալեանի կարծիքով՝ խաղաղութեան պայմանագիր ասւածի ամբողջական եւ լիարժէք ստորագրումն անգամ խաղաղութեան գրաւական չէ: Այս մասին նա գրել է սոցցանցերի իր հարթակներում:
«Շատ է քննարկւում հարցը՝ խաղաղութեան պայմանագրի «նախաստորագրումը» կը բերի՞ խաղաղութեան:
Կարծում եմ, որ խաղաղութեան պայմանագիր ասւածի ամբողջական եւ լիարժէք ստորագրումն անգամ խաղաղութեան գրաւական չէ: Հարցն այստեղ անգամ այն չէ, որ Ադրբեջանը վստահելի չէ: Այսօր վստահելի չէ ըստ էութեան ոչ ոք: Բայց հարցն այդ վստահութիւնը չէ միայն: Հարցն այն է, որ Կովկասում խաղաղութեան ու պատերազմի վերաբերեալ հարցերի առանցքային պատասխանները Երեւանում կամ Բաքւում չեն:
Հետեւաբար, Երեւանն ու Բաքուն կարող են ստորագրել տասնեակ թղթեր, բայց այդ թղթերի արժէքը, նշանակութիւնը, կենսունակութիւնը որոշողների շրջանակը այլ է: Իսկ այդ շրջանակն այսօր ըստ էութեան ներգրաււած է համաշխարհային պատերազմի մէջ:
Հետեւաբար, այդ շրջանակից ցածր մակարդակում որեւէ ստորագրում կամ նախաստորագրում չի կարող ունենալ տակտիկական-իրավիճակայինից բարձր նշանակութիւն»,- գրել է նա:
