Վահէ Դաւթեան. «Բաքուն փորձում է հող պարարտացնել Սիւնիքում իր ներկայութեան ընդլայնման լեգիտիմացման համար»

«ԱԼԻՔ» – Էներգետիկ անվտանգութեան փորձագէտ Վահէ Դաւթեանը համոզւած է, որ Բաքուն փորձում է հող պարարտացնել Սիւնիքում իր ներկայութեան ընդլայնման լեգիտիմացման համար: Այս մասին նա գրել է ֆէյսբուքեան իր էջում:

«Պէտք է առնւազն անյոյս նէոլիբերալ լինես, որպէսզի հաւատաս այն պնդումներին, որ «Թրամփի երթուղին» թոյլ կը տայ էապէս բարձրացնել Հայաստանի անվտանգութիւնը: Յաճախ է խօսւում այն մասին, որ թէեւ Վաշինգտոնը ռազմական ներկայութիւն չի ունենայ Սիւնիքում, սակայն ամերիկեան կապիտալը թոյլ չի տայ այստեղ որեւէ էսկալացիա՝ սեփական կայունութեան ու անվտանգութեան ապահովման նպատակով:

Տեսականօրէն ամէն ինչ ճիշտ է:

Սակայն «գետնի վրայ» ունենք ճիշտ հակառակ պատկերը:

Եթէ այս մօտեցումն աշխատէր, ապա նոյն արեւմտեան կապիտալի առկայութիւնը կը զսպէր Նիգերում, Սուդանում, Թայլանդում եւ բազմաթիւ այլ «եռման կէտերում» տարատեսակ հակամարտութիւնների զարգացումը:

Հեռու չգնանք:

2005 թ. մայիսի 31-ին ՀՀ արտաքին գործերի նախարար Վարդան Օսկանեանը յայտարարեց, որ Բաքու-Թբիլիսի-Ջէյհան նաւթամուղի գործարկումը բացառում է Արցախեան հիմնահարցի ռազմական լուծումը: Նրա պնդմամբ՝ տարածաշրջանում լայնամասշտաբ զինւած հակամարտութիւններն այլեւս քիչ հաւանական են: Այս յայտարարութեան կոնցեպտուալ հիմքը նոյնն է՝ «միջազգային կապիտալը թոյլ չի տայ»:

Դժւար չէ կռահել, թէ ինչ դեր ունեցաւ այդ նաւթամուղը, ինչպէս նաեւ 2020 թւականին շահագործման յանձնւած «Հարաւային գազային միջանցքը» միջազգային պրոադրբեջանական լոբբիստական համակարգի ձեւաւորման եւ, ի վերջոյ, Արցախի հայաթափման գործում:

Այժմ էլ «Թրամփի երթուղու» առանցքային շահառուն՝ Բաքուն փորձում է ներկայացնել նոր հաղորդակցութիւնը որպէս Արեւմուտքը Արեւելքին կապող կարեւոր հանգոյց՝ դրանով իսկ հող պարարտացնելով հետագայում Սիւնիքում սեփական ներկայութեան ընդլայնման միջազգային լեգիտիմացման համար:

Դա, իր հերթին, լիովին տեղաւորւում է արեւմտեան մի շարք դերակատարների, ինչպէս նաեւ Անկարայի ու Թել Աւիւի՝ Կասպից ծովի իրաւական կարգավիճակը փոխելուն ուղղւած նկրտումների մէջ»,- գրել է նա: