Իսրայէլն արգելափակել է մարդասիրական օգնութեան մուտքը Գազայի հատւած
«ԱԼԻՔ» – Իսրայէլի կառավարութիւնը յայտարարել է, որ արգելափակել է ողջ մարդասիրական օգնութեան մուտքը Գազա, քանի որ պաղեստինեան ՀԱՄԱՍ խմբաւորման հետ հրադադարի համաձայնագրի առաջին փուլն աւարտւել է:
Վարչապետ Բենիամին Նեթանիահուի գրասենեակը յայտնել է, որ ՀԱՄԱՍ-ը մինչեւ այս պահը հրաժարւում է ընդունել ԱՄՆ նախագահ Դոնալդ Թրամփի բանագնաց Սթիւ Ուիտկոֆի առաջարկած հրադադարի ռեժիմի ժամանակաւոր երկարաձգումը։
ՀԱՄԱՍ-ի ներկայացուցիչն այս քայլն անւանել է «էժանագին շանտաժ» եւ «յեղաշրջում» հրադադարի համաձայնագրում եւ կոչ է արել միջնորդներին ստիպել Իսրայէլին վերսկսել մարդասիրական օգնութեան մատակարարումները, հաղորդում է BBC News-ը։
Պաղեստինեան խմբաւորումը ցանկանում է, որ համաձայնագրի երկրորդ փուլը շարունակւի սկզբնական պայմանաւորւածութիւններին համապատասխան, ներառեալ պատանդների եւ պաղեստինցի գերիների ազատ արձակումը եւ իսրայէլական ուժերի դուրսբերումը Գազայից:
ՀԱՄԱՍ-ը ուրբաթ երեկոյեան յայտարարել է, որ չի համաձայնի առաջին փուլի երկարաձգմանը առանց ԱՄՆ-ի, Կատարի եւ Եգիպտոսի միջնորդների երաշխիքների, որ երկրորդ փուլն ի վերջոյ տեղի կունենայ:
Մարտի 1-ի ուշ երեկոյեան Նեթանիահուի վարչակազմը յայտնել է, որ Իսրայէլը համաձայնել է ԱՄՆ-ի առաջարկին՝ հրադադարը մօտ վեց շաբաթով երկարաձգել մահմեդական Ռամադանի եւ հրէական Պեսախի ժամանակ:
Եթէ այս ժամկէտից յետոյ բանակցութիւնները մտնեն փակուղի, Իսրայէլն իրեն իրաւունք է վերապահում վերսկսել պատերազմը։ ԱՄՆ բանագնաց Ուիտկոֆն իր առաջարկը չի հրապարակել։
Ըստ Իսրայէլի, այն կը սկսւի ողջ մնացած եւ մահացած պատանդների կէսի ազատ արձակմամբ:
Նեթանիահուի գրասենեակից յայտնել են, որ Իսրայէլն անյապաղ բանակցութիւններ կը սկսի, եթէ ՀԱՄԱՍ-ը փոխի իր դիրքորոշումը 6 շաբաթով հրադադարը երկարաձգելու վերաբերեալ: Այս մասին հաղորդել է yerkir.am-ը:
