Մեքքայի համաձայնութիւնը՝ ուղերձ Թեհրանին
Նոյն կապակցութեամբ ԻՌՆԱ-ն գրել է, որ Մեքքայի նոր տարածաշրջանային համաձայնութիւնը, թէեւ ուղղակիօրէն հակաիրանական չէ, կարող է երկարաժամկէտ հետեւանքներ ունենալ Իրանի տարածաշրջանային դիրքի համար։ Խնդիրը ոչ այնքան հակաիրանական դաշինքի ձեւաւորումն է, որքան այն, որ Պարսից ծոցի եւ Մերձաւոր Արեւելքի երկրները կարող են աստիճանաբար ստեղծել տնտեսական, անվտանգային, պաշտպանական եւ տարանցիկ համագործակցութիւնների նոր ցանցեր՝ առանց Իրանի մասնակցութեան։
Այս գործընթացը կարող է յանգեցնել մի իրավիճակի, երբ պատերազմից յետոյ Իրանը ստիպւած լինի յարմարւել արդէն ձեւաւորւած տարածաշրջանային պայմանաւորւածութիւններին։ Կասպից ծովի փորձը ցոյց է տալիս, որ նոյնիսկ երբ ընդհանուր համաձայնութիւն չի կայանում, երկկողմ եւ բազմակողմ պայմանաւորւածութիւնները կարող են շարունակւել եւ աստիճանաբար փոխել տարածաշրջանային ուժերի դասաւորումը։
Միւս կողմից՝ Չինաստանն ու Եւրոպան եւս շահագրգռւած են տարածաշրջանային, ներքին ուժերով ձեւաւորւող անվտանգային ու տնտեսական համակարգերի ստեղծմամբ։ Հետեւաբար Իրանի համար հիմնական հարցը ոչ թէ այդ գործընթացներին դիմակայելն է, այլ դրանց մէջ իր տեղն ու դերակատարութիւնը ժամանակին ապահովելը։
Իրանը չի կարող յաւերժ իր արտաքին քաղաքականութիւնն ու ազգային անվտանգութիւնը կառուցել պատերազմի տրամաբանութեամբ։ Պատերազմից յետոյ վերականգնւելու են բանակցութիւնները, առեւտուրը, տարանցիկ կապերը եւ տարածաշրջանային համագործակցութիւնը։ Հետեւաբար Թեհրանի ներկայ մարտական ձեռքբերումները երկարաժամկէտ ազգային շահի վերածելու համար անհրաժեշտ է այժմ իսկ ձեւաւորել Իրանի տեղը ապագայ տարածաշրջանային կարգի մէջ։
