Քրիստինէ Վարդանեան. «Եթէ անգամ Փաշինեանն ու Ալիեւը պայմանաւորւեն Երեւանի յանձնման մասին, այդ պայմանաւորւածութիւնը դարձեալ ողջունւելու է բազմաթիւ պետութիւնների կողմից»
Եթէ անգամ Փաշինեանն ու Ալիեւը պայմանաւորւեն Երեւանի յանձնման մասին, այդ պայմանաւորւածութիւնը դարձեալ ողջունւելու է բազմաթիւ պետութիւնների կողմից. այս մասին ֆէյսբուքեան էջում գրել է ԱԺ «Հայաստան» խմբակցութեան պատգամաւոր Քրիստինէ Վարդանեանը:
«Երբ կոնֆլիկտի կողմերը պայմանաւորւում են որեւէ բանի շուրջ, շատ քչերին է հետաքրքրում՝ ում հաշւին են այդ պայմանաւորւածութիւնները։
Պրահայի յայտարարութիւնը, դրան յաջորդած ողջոյններն ու ողջոյներին յաջորդած էթնիկ զտումն ու Արցախի հայաթափումը սրա վառ վկայութիւնն են»,- նշել է պատգամաւորը։
Յիշեցնենք, որ աւելի վաղ Հայաստանի եւ Ադրբեջանի միջեւ խաղաղութեան համաձայնագրի նախագծի տեքստի համաձայնեցման շուրջ բանակցութիւնների աւարտը ողջունել են Ֆրանսիան, Իսպանիան, Գերմանիան:
ՀՀ ԱԳՆ-ն յայտարարութիւն է տարածել, որում ասւում է.
«Հայաստանի Հանրապետութեան ԱԳ նախարարութիւնը դիւանագիտական խողովակներով Ադրբեջանի ԱԳ նախարարութեանը փոխանցել է, որ Հայաստանի Հանրապետութիւնն ընդունում է «Հայաստանի Հանրապետութեան եւ Ադրբեջանական Հանրապետութեան միջեւ խաղաղութեան եւ միջպետական յարաբերութիւնների հաստատման մասին համաձայնագրի» նախագծի չհամաձայնեցւած երկու յօդւածների վերաբերեալ Ադրբեջանի առաջարկութիւնները եւ առաջարկել է հանդէս գալ համատեղ յայտարարութեամբ՝ խաղաղութեան համաձայնագրի նախագծի տեքստի համաձայնեցւած լինելու եւ նախագծի համաձայնեցման շուրջ բանակցութիւնների աւարտի մասին։
Պաշտօնական Բաքուն նախընտրել է հանդէս գալ միակողմանի յայտարարութեամբ։
Հայաստանի Հանրապետութեան ԱԳ նախարարութիւնը հաստատում է «Հայաստանի Հանրապետութեան եւ Ադրբեջանական Հանրապետութեան միջեւ խաղաղութեան եւ միջպետական յարաբերութիւնների հաստատման մասին» համաձայնագրի նախագծի համաձայնեցւած լինելու եւ նախագծի համաձայնեցման շուրջ բանակցութիւնների աւարտի փաստը։
Այսպիսով, Խաղաղութեան համաձայնագիրը պատրաստ է ստորագրման։ Հայաստանի Հանրապետութիւնը պատրաստ է Ադրբեջանական Հանրապետութեան հետ սկսել խորհրդակցութիւններ համաձայնագրի ստորագրման ժամկէտների եւ տեղի շուրջ»:
Հաղորդել է tert.am-ը:
