«ԱԼԻՔ» – Իրանագէտ Վարդան Ոսկանեանը սոցցանցի իր հարթակներում գրառում է կատարել, ուր յիշելով տարիներ առաջ Դուբայ կատարած իր առաջին ճամփորդութիւնը՝ խօսել է Թեհարնի ու Դուբայի օդանաւակայաններից իր ստացած տպաւորութեան մասին: Այդ համատեքստում նա անդրադարձել է Իսրայէլի վրայ Իրանի հնարաւոր յարձակման ձեւին եւ որակին:
«Տարիներ առաջ, երբ Թեհրանի օդանաւակայանից առաջին անգամ հասայ Դուբայի օդանաւակայան, ինքնաթիռում ինձ պատրաստում էի արաբերէն խօսելու, քանի որ խօսակցական արաբերէնի փորձառութիւն ընդհանրապէս չունեմ։
Տեղում շատ զարմացայ, քանի որ ոչ մի արաբ աշխատակից փաստօրէն չկար, իսկ հիմնական հաղորդակցութեան լեզուն անգլերէնն էր։
Դուբայի օդանաւակայանը Թեհրանից շատ աւելի գեղեցիկ էր եւ ճոխ, բայց տարօրինակ կերպով ամենեւին չհաւանեցի։ Յետոյ հասկացայ, որ պատճառը մէկն էր՝ Թեհրանն իր գեղեցկութեամբ եւ նոյնիսկ իր թերութիւններով ամէն ինչով բնական էր, Դուբայը միայն գեղեցիկ, բայց անբնական։
Իրանական գործելաոճը գրեթէ ամէն ինչում այդպիսին է, նոյնիսկ Իրան-Իսրայէլ յարաբերութիւններում։ Իրանցիներն աւելորդ են համարում աղմուկը եւ, թող թոյլ տրւի ասել, «տպաւորիչ» լինելը, ուստի իրանական պատասխանն Իսմայիլ Հանիէի սպանութեանը չի լինելու տպաւորիչ պատկերով, սակայն լինելու է արժանի եւ անզուգաչափ։
Ընդհանրապէս, Իրանը չի գործում գլխակորոյս եւ այսրոպէական որոշումներով կամ աղմկոտ «տպաւորիչ» սպանութիւնների տրամաբանութեամբ, այլ աստիճանաբար հիւծում է իր ախոյաններին երկարատեւ եւ անշտապ գործողութիւններով»,- գրել է նա:
