Մայր Աթոռ. «Միքայէլ Սրբազանն ու Սամուէլ Կարապետեանը պէտք է անյապաղ ազատ արձակւեն»
«ԱԼԻՔ» – «Գերաշնորհ Միքայէլ արքեպիսկոպոս Աջապահեանին եւ ազգային բարերար Սամուէլ Կարապետեանին կալանքի տակ պահելը երկարացնելու որոշումներով դատարանը հերթական անգամ ոտնահարեց արդարադատութիւնը՝ կրկին պարզորոշ դարձնելով իշխող քաղաքական ուժից դատարանների լիակատար կախւածութիւնը»: Ասւած է Միքայէլ Սրբազանի եւ Սամուէլ Կարապետեանի խափանման միջոցներն անփոփոխ թողնելու մասին դատարանների որոշման վերաբերեալ մայր Աթոռ Սուրբ Էջմիածնի հրապարակած յայտարարութեան մէջ:
Յայտարարութեան համաձայն` նման անհիմն որոշումներով արդարադատութիւնը ձեռք է բերում պատժիչ նշանակութիւն, իսկ դատարանները վեր են ածւում ազատ խօսքի եւ կրօնի ազատութեան բռնաճնշման գործիքի:
«Այսպիսի գործելաոճը բնորոշ է ամբողջատիրական համակարգերին եւ աղերս չունի հէնց իշխանութիւնների կողմից տարփողւող ժողովրդավարական արժէքների հետ:
Եկեղեցու, եկեղեցականների եւ եկեղեցու աջակիցների նկատմամբ կիրառւող բռնաճնշումները եւ տեղեկատւական ահաբեկչութեան միջոցները չեն կարող լռեցնել խղճի եւ արդարութեան ձայնը:
Միքայէլ արքեպիսկոպոս Աջապահեանի եւ ազգային բարերար Սամուէլ Կարապետեանի իրաւունքները պէտք է անյապաղ վերականգնւեն, բացառւի ապօրինի հետապնդումը, եւ նրանք պէտք է անյապաղ ազատ արձակւեն կալանքից»,- ասւած է հրապարակւած յայտարարութեան մէջ:
