Փեզեշքիանը՝ Պուտինի հետ հեռախօսազրոյցում. «Իրանը երբեք չի ձգտել, չի ձգտում եւ չի ձգտելու ստեղծել միջուկային զէնք»

«ԱԼԻՔ» – Ռուսաստանի Դաշնութեան նախագահ Վլադիմիր Պուտինը երէկ՝ միջօրէին, հեռախօսազրոյց է ունեցել Հանրապետութեան նախագահ Մասուդ Փեզեշքիանի հետ:

Հեռախօսազրոյցի ընթացքում, Պուտինը ներկայացրել է Ալեասկայում կայացած ռուս-ամերիկեան գագաթնաժողովի հիմնական արդիւնքները։ Պուտինը նշել է, որ հանդիպման ընթացքում լաւ արդիւնքներ են գրանցւել, որոնք եթէ լիովին իրականցւեն, կը լուծեն ուկրաինական հակամարտութեան հարցը:

 «Այս հանդիպման ժամանակ մեր քննարկումներն ամբողջութեամբ Ուկրաինայի հարցի շուրջ էին»,- ասել է նա:

Շարունակութեանը, ՌԴ նախագահը Իրանի Իսլամական Հանրապետութեան հետ յարաբերութիւնները բնութագրել է որպէս կառուցողական եւ յարաճուն՝ յաւելելով. «Երկու երկրների միջեւ առեւտրային փոխանակումները այս տարւայ առաջին վեց ամիսներին աճել են 11 տոկոսով, եւ այլ ոլորտներում, այդ թւում՝ Ռաշտ-Աստարա երկաթուղու կառուցման կարեւոր ոլորտում, համագործակցութիւնը նոյնպէս առաջընթաց է գրանցում»։

Նշելով, որ Բուշեհրի ատոմակայնի հետ կապւած երկու երկրների համագործակցութիւնը նոյնպէս բաւարար ընթացք ունի՝ Պուտինը յաւելել է. «Տեխնիկական համագործակցութիւնն իրականացւում է սահմանւած ժամանակացոյցի համաձայն, եւ ատոմակայանի համար նոր վառելիքի փոխանցումը նոյնպէս ընթացքի մէջ է»։

Շեշտելով, որ Իրանի Իսլամական Հանրապետութեան՝ ուրանը հարստացնելու իրաւունքը Ռուսաստանի տեսանկիւնից անբեկանելի է՝ ՌԴ նախագահը յայտարարել է. «Յուսով եմ, որ 2231 բանաձեւի հարցի շուրջ բանակցութիւնները նոյնպէս կը յանգեն դրական աւարտի»։

Նախագահ Փեզեշքիանն էլ իր հերթին գոհունակութիւն է յայտնել այն մասին, որ Ալեասկայում տեղի ունեցած բանակցութիւնները դրական արդիւնք են ունեցել, եւ յոյս է յայտնել, որ ձեռք բերւած պայմանաւորւածութիւնները կը յանգեցնեն ուկրաինական ճգնաժամի հնարաւորինս շուտ կարգաւորման:

Անդրադառնալով երկկողմ յարաբերութիւններին, Հանրապետութեան նախագահն ասել է. «Ռուսաստանի հետ երկկողմ փոխգործակցութիւններից բացի, Իրանը տարածաշրջանային եւ միջազգային կազմակերպութիւնները, ինչպիսիք են Եւրասիական միութիւնը, Շանհայի համագործակցութեան կազմակերպութիւնը եւ BRICS-ը, համարում է անդամ երկրների, մասնաւորապէս՝ Ռուսաստանի եւ Չինաստանի հետ համագործակցութեան բարենպաստ հարթակներ՝ միակողմանիութեանը արդիւնաւէտօրէն դիմակայելու համար»։

Բարձր գնահատելով Ռուսաստանի դիրքորոշումն Իրանի Իսլամական Հանարպետութեան՝ ուրանի հարստացման իրաւունքի վերաբերեալ, նախագահ Փեզեշքիանն ասել է. «Իր հիմնարար համոզմունքների եւ պաշտպանական դոկտրինայի հիման վրայ, Իրանը երբեք չի ձգտել, չի ձգտում եւ երբեք չի ձգտելու ստեղծել միջուկային զէնք»։

Անդրադառնալով Հայաստան կատարած իր վերջին այցին՝ Փեզեշքիանը նշել է. «Այս այցի ընթացքում Հայաստանի վարչապետը վստահեցրել է, որ Ադրբեջանի Հանրապետութեան եւ Միացեալ Նահանգների հետ վերջին բանակցութիւններում եւ համաձայնագրերում լիովին հաշւի են առնւել Իրանի Իսլամական Հանրապետութեան, ինչպէս նաեւ Ռուսաստանի Դաշնութեան նկատառումները: Այդուհանդերձ, կարծում եմ, որ Իրանի եւ Ռուսաստանի մասնակցութեամբ 3+3 ձեւաչափի շրջանակն աւելի արդիւնաւէտ մեխանիզմ է Կովկասեան տարածաշրջանում խնդիրները լուծելու համար»:

Երկու նախագահները պայմանաւորւել են հանդիպել Չինաստանում կայանալիք Շանհայի համագործակցութեան կազմակերպութեան գագաթնաժողովի ժամանակ: