Դեսպան Սոբհանին հանդիպել է Արարատ Միրզոյեանի հետ
«ԱԼԻՔ» – Իր դիւանագիտական առաքելութեան աւարտի առիթով, ՀՀ-ում Իրանի Իսլամական Հանրապետութեան արտակարգ եւ լիազօր դեսպան Մեհդի Սոբհանին հանդիպել է ՀՀ ԱԳ նախարար Արարատ Միրզոյեանի հետ: Այս մասին յայտնում են ՀՀ ԱԳՆ-ից:
Նախարար Միրզոյեանն ընդգծել է՝ չնայած, որ դեսպան Սոբհանին պաշտօնավարել է բաւական բարդ ժամանակահատւածում, այդուհանդերձ այս ընթացքում երկու երկրներին յաջողւել է ոչ միայն յաղթահարել դժւարութիւնները, այլեւ երկկողմ յարաբերութիւններում գրանցել շօշափելի արդիւնքներ: Այս համատեքստում զրուցակիցները քննարկել են Իրան-Հայաստան ռազմավարական գործընկերութեան զարգացմանն ուղղւած ընթացիկ ու հետագայ աշխատանքները, որոնք ներառում են փոխադարձ հետաքրքրութիւն ներկայացնող մի շարք ոլորտներ՝ ենթակառուցւածքներ, էներգետիկա եւ այլն:
Երկուստեք ընդգծւել է, որ Իրան-Հայաստան համագործակցութիւնը հիմնւած է երկու ժողովուրդների միջեւ բարեկամութեան, տարածաշրջանային խաղաղութեան համար կարեւոր սկզբունքների անվերապահ յարգման եւ առանցքային հարցերում ձեւաւորւած փոխըմբռնման վրայ։
Իրանի եւ Հայաստանի միջեւ փոխգործակցութեան խորացման, ինչպէս նաեւ հայ-իրանական բարեկամական յարաբերութիւնների ամրապնդման եւ զարգացման գործում ներդրած նշանակալի աւանդի համար նախարար Միրզոյեանը դեսպան Մեհդի Սոբհանիին յանձնել է ՀՀ նախագահի հրամանագրով նրան շնորհւած Բարեկամութեան շքանշանը՝ յաջողութիւն մաղթելով հետագայ գործունէութեան մէջ:
