Արաղչին՝ ՄԱԿ-ի ԳՔ-ին եւ ԱԽ նախագահին ուղղւած նամակում. «2231 բանաձեւով չեղարկւած բանաձեւերի ենթադրեալ վերականգնումն անընդունելի է»
«ԱԼԻՔ» – ՄԱԿ-ի գլխաւոր քարտուղարին եւ Անվտանգութեան խորհրդի նախագահին ուղղւած նամակում ԱԳ նախարար Սէյէդ Աբբաս Արաղչին նշել է, որ Իրանի Իսլամական Հանրապետութիւնը վճռականօրէն մերժում է 2231 բանաձեւով չեղարկւած բանաձեւերի ենթադրեալ վերականգնումը, եւ ո՛չ Իրանը, ո՛չ էլ ՄԱԿ-ի որեւէ անդամ երկիր պարտաւոր չէ հետեւել նման անօրինական գործողութիւններին։
Նամակում մասնաւորապէս նշւած է.
«Ինչպէս յստակ նշել եմ 2025 թւականի սեպտեմբերի 26-ի Անվտանգութեան խորհրդի նիստում իմ յայտարարութեան մէջ, կրկին ընդգծում եմ.
– Եւրոպական երեք երկրները, խախտելով իրենց պարտաւորութիւնները Համատեղ համապարփակ գործողութիւնների ծրագրի եւ 2231 բանաձեւի շրջանակներում, կորցրել են «հիմնարար խախտման» մասին կէտին վկայակոչելու որեւէ իրաւասութիւն: Այսպէս կոչւած Snapback մեխանիզմի կիրառումը նրանց կողմից պարզապէս գործընթացի ակնյայտ չարաշահում է:
– Խորհրդի նախագահի կողմից սեպտեմբերի 19-ին քւէարկութեան ներկայացւած որոշման նախագիծը չի համապատասխանում 2231 բանաձեւի պահանջներին եւ չի կարող վերականգնել արդէն չեղեալ յայտարարւած պատժամիջոցները։
– Եւրոպական երեք երկրների եւ Միացեալ Նահանգների կողմից ժամկէտանց պատժամիջոցները վերականգնելու ջանքերը ապարդիւն են եւ անվաւեր։
– 2231 բանաձեւը պէտք է դադարի գործել համաձայնեցւած ժամկէտի համաձայն։ 2231 բանաձեւով նախատեսւած բոլոր միջուկային սահմանափակումները ընդմիշտ կաւարտւեն 2025 թւականի հոկտեմբերի 18-ին։ Իրանի Իսլամական Հանրապետութիւնը չի ճանաչի դրանք նշեալ թւականից յետոյ երկարաձգելու, վերականգնելու կամ կիրառելու որեւէ փորձ։
Հետեւաբար, Իրանի Իսլամական Հանրապետութիւնը վճռականօրէն մերժում է 2231 (2015 թ.) բանաձեւով չեղեալ յայտարարւած բանաձեւերի ենթադրեալ վերականգնումը. ո՛չ Իրանը, ո՛չ էլ ՄԱԿ-ի որեւէ անդամ երկիր պարտաւոր չեն հետեւել նման անօրինական գործողութիւններին»:
Արաղչին կոչ է արել ՄԱԿ-ի գլխաւոր քարտուղարին կանխել պատժամիջոցների մեխանիզմները, այդ թւում՝ Պատժամիջոցների կոմիտէն եւ Փորձագէտների խումբը վերականգնելու որեւէ փորձ՝ ընդգծելով, որ ՄԱԿ-ի որեւէ ռեսուրս չպէտք է յատկացւի կամ օգտագործւի նման անօրինական գործողութիւններին աջակցման համար:
«Իրանի Իսլամական Հանրապետութիւնը մշտապէս ցոյց է տւել իր պատրաստակամութիւնը դիւանագիտութեան միջոցով՝ արդար, հաւասարակշռւած եւ կայուն լուծումների հասնելու համար։
Ցաւօք, եւրոպական երեք երկրները եւ Միացեալ Նահանգները ընտրել են առճակատման ուղին՝ այն սխալ ենթադրութեամբ, որ Իրանը կընկրկի հարկադրանքի առջեւ։ Պատմութիւնն ապացուցել է, որ այս ենթադրութիւնը սխալ է, եւ կրկին կապացուցի։
Իրանի Իսլամական Հանրապետութիւնը կը շարունակի վճռականօրէն պաշտպանել իր ինքնիշխան իրաւունքներն ու շահերը։ Իրանին վնասելու որեւէ փորձ կարժանանայ համարժէք պատասխանի, եւ դրա ողջ պատասխանատւութիւնը կը կրեն նրանք, ովքեր համագործակցութեան փոխարէն նախընտրել են առճակատումն ու ճնշումը»,- եզրափակել է Արաղչին:
