Իշխան Սաղաթէլեան. «Սա մաքրւելու, ջրեր զուլալելու, թացը չորից տարբերակելու հնարաւորութիւն էր»
«ԱԼԻՔ» – ՀՅԴ Հայաստանի ԳՄ ներկայացուցիչ, ՀՀ ԱԺ «Հայաստան» խմբակցութեան պատգամաւոր Իշխան Սաղաթէլեանը ֆէյսբուքեան իր էջում գրառում է կատարել՝ անդրադառնալով վերջին օրերի իրադարձութիւններին:
Նա մասնաւորապէս գրել է.
«Տարիներ յետոյ պատմաբանները Հայաստանի այս շրջանի մասին կը գրեն, որ Արցախը յանձնած, հայ ժողովրդին մահ, պարտութիւն եւ ողբերգութիւն բերած Փաշինեանը այդքանից յետոյ շարունակում էր մնալ իշխանութեան, քանի որ
– պատերազմից յետոյ գտնւեցին բանակի գեներալներ, ովքեր կանգնեցին նրա առաջ եւ պատւի առան,
– գտնւեցին հոգեւորականներ, սրբազաններ, ովքեր եկեղեցին պղծողի եւ իրենց հոգեւոր եղբայրներին գերի վերցնողի առաջ ծնկի եկան, իսկ Արցախի թեմի առաջնորդը խոնարհւեց Արցախը յանձնողի առաջ,
– գտնւեցին քաղաքական ուժեր, գործիչներ, ովքեր համակերպւեցին, պայմանաւորւեցին, վախեցան եւ այդպէս էլ պատասխանատւութիւն չստանձնեցին պայքարելու,
– գտնւեցին գործիչներ, ովքեր սոցիալական ցանցերից այդպէս էլ դուրս չեկան կամ գլխաւոր թիրախին թողնելով` հին ու նոր արեցին,
– գտւեցին հայ գործարարներ, ովքեր ֆինանսաւորեցին դաւաճանին իր հակահայ ծրագրերը իրականացնելու համար,
– գտւեցին քննիչներ, դատախազներ, դատաւորներ, ովքեր բութ գործիք դարձան ազգակործանի ձեռքին նրա իշխանութիւնը պահելու համար։
Բայց նաեւ կը գրեն, որ այս ամէնը ունէր նաեւ դրական ազդեցութիւն. սա մաքրւելու, ջրեր զուլալելու, թացը չորից տարբերակելու հնարաւորութիւն էր։
Կը գրեն, որ վերը նշւած մարդկանց կողքին կային արժանապատիւ հոգեւորականներ, գործարարներ, ազգային գործիչներ, զինւորականներ, դատաւորներ, պարզապէս ազնիւ եւ հայրենասէր քաղաքացիներ, ովքեր զրկանքների, բանտարկութիւնների գնով պայքարեցին եւ չյանձնւեցին:
Եւ այս ամօթալի շրջանը երկար չտեւեց. Եկեղեցին եւ իսկական հոգեւորականները մնացին կանգուն, ազգային ուժերը չկոտրւեցին, կազմակեպեցին իրենց ժողովրդին՝ ազատագրելով հայրենիքը դաւաճաններից եւ գործակալներից»:
