Մարիա Զախարովա. «Ափսոսանք է առաջացնում այն, որ Ալէն Սիմոնեանը վերադարձել է իր հին հռետորաբանութեանը»

«ԱԼԻՔ» – ՌԴ ԱԳՆ պաշտօնական ներկայացուցիչ Մարիա Զախարովան մայիսի 6-ին կազմակերպւած ամենշաբաթեայ բրիֆինգի ընթացքում ՀՀ ԱԺ խօսնակ Ալէն Սիմոնեանին վերագրեց արեւմտեան ու բրիւսէլեան «մեթոդիկա»-ների կիրառումը Ռուսաստանի հետ յարաբերութիւնների հարցում։ Անդրադառնալով Ալէն Սիմոնեանի նախօրէի յայտարարութիւններին, թէ ՌԴ-ն մեծ գումարներ է ծախսում ՀՀ-ում հիբրիդային պատերազմի համար, Զախարովան նշեց, որ սա ագրեսիւ հռետորաբանութեան հերթական փուլն է, որը զարմանք է յարուցում։

«ՀՀ ղեկավարութեան նկատմամբ ի՞նչ հիբրիդային պատերազմի մասին կարող է խօսք լինել, եթէ, ինչպէս մենք հասկանում ենք, Հայաստանն այստեղ ներկայացւած է լինելու միջոցառումներին եւ բարձրաստիճան շփումն ընթանում է բնականոն հունով, ինչպէս նաեւ ԱԳՆ գծով»,- ասել է Զախարովան։

Նրա կարծիքով՝ ՀՀ ԱԺ խօսնակի յայտարարութիւններում անհամապատասխանութիւն կայ։

«Երեւի թէ պէտք է ընդհանուր դիրքորոշում մշակել այս հարցի շուրջ։ Ես չեմ պատկերացնում իրավիճակ, որից նա խօսում է՝ գուցէ ինչ-որ մէկի հրահրմամբ, կարող էր իրականում տեղի ունենալ։ Գոնէ փաստեր ինչ-որ մէկը կը կարողանա՞յ ներկայացնել։ Սա այլեւս անտանելի է, սա ինչ-որ բրիւսէլեան մեթոդաբանութեան կիրառում է, անարժան է»,- նկատել է նա։

Զախարովան, անդրադառնալով նաեւ Երեւանի Նոր Նորքի թաղապետարանում թաղապետի մասնակցութեամբ տեղի ունեցած ծեծկռտուքին, որը վերագրում են ՌԴ դեսպանատանը, ասել է․«Այս տարիների ընթացքում շատ բան եմ լսել, բայց որ ՌԴ-ն թաղապետարաններում է ինչ-որ բաներ կազմակերպում, առաջին անգամն էր։ Դժւարութեամբ եմ պատկերացնում, թէ դա ինչպէս կարող էր տեղի ունենալ։ Ես հակադիր հարց ուղղեմ՝ իսկ նրանք փաստեր ունե՞ն, թէկուզ ինչ-որ բան, թէ ինչպէս ՌԴ դեսպանատունը կարող էր այդ յարգարժան թաղապետարանում իրեն ինչ-որ կերպ դրսեւորել, ինչպէ՞ս։ Օրինակ՝ Բայդէնը, նրա ողջ թիմը, Քլինթոնը յօրինել էին ռուս հաքերների պատմութիւնը, որոնք նրանց խանգարում էին ապրել։ Յետոյ պարզւեց, որ այդ ամէնը ճիշտ չէ։ Ինչ-որ մէկը յօրինել էր «Նովիչոկի» պատմութիւնը․․․ Ինչպէ՞ս  էր տեխնոլոգիապէս հնարաւոր նման բան, նրանց տեսանկիւնից, ովքեր մեղադրում են Ռուսաստանին ու ՌԴ դեսպանատանը անկարգութիւններում կամ խնդիրներում, որոնք․․․ ինձ իսկապէս հետաքրքիր է։ Ես շատ բան եմ լսել։ Թաղապետարանների մասին չէի լսել, առաջին անգամն էր, կը ցանկանայի հասկանալ, թէ ինչպէս են դա նրանք պատկերացնում։ Իրականում ինձ մօտ տպաւորութիւն է, որ դա ներքաղաքական հարցերն արտաքին քաղաքական գործօններով լուծելու փորձ է»։