Սի Ծինփին. «Չինաստանի եւ Ռուսաստանի յարաբերութիւնները խոշոր պետութիւնների միջեւ յարաբերութիւնների չափանիշ են»
«ԱԼԻՔ» – Չինաստանի նախագահ Սի Ծինփինը յայտարարել է, որ Չինաստանի եւ Ռուսաստանի յարաբերութիւնները խոշոր երկրների միջեւ յարաբերութիւնների չափանիշ են, որոնք բնութագրւում են յաւերժական բարիդրացիականութեամբ եւ բարեկամութեամբ, համապարփակ ռազմավարական փոխազդեցութեամբ, փոխշահաւէտ համագործակցութեամբ եւ փոխադարձ օգուտով: Այս մասին ըստ Tert.am-ի՝ հաղորդում է չինական Xinhua գործակալութիւնը։
Սի Ծինփինը այդ յայտարարութիւնն արել է Ռուսաստանի նախագահ Վլադիմիր Պուտինի հետ բանակցութիւնների ժամանակ, որը Չինաստան էր ժամանել Շանհայի համագործակցութեան կազմակերպութեան (ՇՀԿ) 2025 թւականի գագաթնաժողովին եւ Չինաստանի ժողովրդի դիմադրութեան պատերազմում ճապոնական ագրեսիայի դէմ եւ Համաշխարհային հակաֆաշիստական պատերազմում յաղթանակի 80-ամեակին նւիրւած միջոցառումներին մասնակցելու համար։
Ըստ Սի Ծինփինի՝ Չինաստանը պատրաստ է ամրապնդել բարձր մակարդակի փոխանակումները Ռուսաստանի հետ, աջակցել միմեանց զարգացմանը եւ վերածննդին, ժամանակին համակարգել դիրքորոշումները երկու երկրների առանցքային շահերին եւ հիմնական մտահոգութիւններին վերաբերող հարցերի շուրջ եւ խթանել միջպետականյարաբերութիւնների էլ աւելի մեծ զարգացումը։
Չինաստանի նախագահը շեշտել է, որ երկու կողմերը պէտք է իրենց համագործակցութիւնն ուղղորդեն խոշորածաւալ նախագծերի միջոցով, ստեղծեն համագործակցութեան մոդելային նախագծեր եւ խթանեն միմեանց շահերի խոր ինտեգրումը։ Նա կոչ արեց ամրապնդել դիմադրողականութիւնը եւ խորացնել փոխըմբռնումը համագործակցութեան մէջ, ինչպէս նաեւ ջանքեր գործադրել երկկողմ համագործակցութեան ընդհանուր վիճակն ամրապնդելու եւ պահպանելու համար։
Ըստ Սի Ծինփինի՝ Չինաստանի եւ Ռուսաստանի պետութիւնների ղեկավարների փոխադարձ մասնակցութիւնը Երկրորդ համաշխարհային պատերազմում յաղթանակի առթիւ երկու կողմերի կազմակերպած միջոցառումներին լիովին ցոյց է տալիս երկու խոշոր երկրների պատասխանատւութիւնը՝ որպէս Երկրորդ համաշխարհային պատերազմի գլխաւոր յաղթողներ եւ ՄԱԿ-ի Անվտանգութեան խորհրդի մշտական անդամներ։ Այն ցոյց է տալիս նաեւ երկու երկրների վճռականութիւնը՝ պաշտպանելու Երկրորդ համաշխարհային պատերազմում տարած յաղթանակի արդիւնքները եւ Երկրորդ համաշխարհային պատերազմի ճիշտ պատմական տեսակէտը,- նշել է նա։
Սի Ծինփինն ընդգծել է, որ իր առաջ քաշած Գլոբալ կառավարման նախաձեռնութիւնը նպատակ ունի համատեղ աշխատել բոլոր այն երկրների հետ, որոնք ունեն ընդհանուր ձգտումներ՝ ՄԱԿ-ի կանոնադրութեան նպատակներն ու սկզբունքները վճռականօրէն պաշտպանելու եւ աւելի արդար եւ ռացիոնալ գլոբալ կառավարման համակարգ խթանելու համար։
Չինաստանը եւ Ռուսաստանը պէտք է աւելի ամրապնդեն համակարգումը բազմակողմ հարթակներում, ներառեալ ՄԱԿ-ում, ՇՀԿ-ում, BRICS-ում եւ G20-ում՝ մարդկութեան համար ընդհանուր ապագայով համայնքի կառուցումը համատեղ առաջ մղելու համար, ընդգծել է Ծինփինը։
