ՌԴ ԱԳՆ. «ՆԱՏՕ-ն շարունակում է Հարաւային Կովկասի երկրներին իր ազդեցութեան գօտի ներքաշելու կուրսը»
«ԱԼԻՔ» – «Հիւսիսատլանտեան դաշինքի ցանկացած գործողութիւն Հարաւային Կովկասում ուղղւած է այդ տարածաշրջանում անկայունութեան գօտի ստեղծելուն»: Այս մասին, ըստ ռուսական «Ինտերֆաքս» գործակալութեան՝ երէկ՝ մայիսի 6-ին, յայտարարել է ՌԴ ԱԳՆ պաշտօնական ներկայացուցիչ Մարիա Զախարովան։
«Ապրիլի 28-ից Վրաստանում անցկացւում են ՆԱՏՕ-ի մասնակցութեամբ հերթական հրամանատարաշտաբային զօրավարժութիւնները: Ըստ առկայ տեղեկութիւնների, միջոցառմանը մասնակցում են ռազմական բլոկի գործընկեր 17 երկրներ, այդ թւում՝ Հայաստանն ու Ադրբեջանը: Այսպիսով, դաշինքը շարունակում է Հարաւային Կովկասի հանրապետութիւնները իր ազդեցութեան ուղեծիր ներքաշելու ընթացքը»,- յայտարարել է Զախարովան։
Նա նշել է, որ «որպէս կանոն, փոխգործակցութեան նման ձեւաչափերի միջոցով է, որ ՆԱՏՕ-ն տարածաշրջանային ուժերին պարտադրում է իր չափանիշներն ու գաղափարախօսութիւնը, պայմաններ է ստեղծում պաշտպանական համալիրի վերափոխման, զինւած ուժերի զարգացման եւ արտաքին քաղաքականութեան գործընթացի նկատմամբ վերահսկողութիւն սահմանելու համար»։
«Ոչ ոք չպէտք է պատրանքներ ունենայ: Հիւսիսատլանտեան դաշինքի ցանկացած գործողութիւն Հարաւային Կովկասում ուղղւած չէ անվտանգութեան ամրապնդմանը, այլ այնտեղ անկայունութեան եւ ռազմաքաղաքական լարւածութեան գօտի ստեղծելուն»,- ընդգծել է Զախարովան։
Նա յոյս է յայտնել, որ վերոնշեալ հանրապետութիւնները «վճռական մօտեցում կը ցուցաբերեն նման միջոցառումներին մասնակցելու հարցում»։
