Լաւ սկիզբ Մասկատում. Վերջնական որոշումները՝ Թեհրանում եւ Վաշինգտոնում

Իրանի եւ Միացեալ Նահանգների միջեւ միջուկային բանակցութիւնների նոր փուլը մեկնարկեց ուրբաթ, փետրւարի 6-ին, Օմանի մայրաքաղաք Մասկատում՝ այդ երկրի միջնորդութեամբ։ Բանակցութիւնների աւարտից յետոյ Իրանի արտաքին գործերի նախարար Սէյէդ Աբբաս Արաղչին այն գնահատել է որպէս «դրական» եւ համարել «լաւ սկիզբ»։

Արաղչին ընդգծել է, որ բանակցութիւնների հետագայ շարունակութիւնը կախւած է կողմերի մայրաքաղաքներից՝ Թեհրանից եւ Վաշինգտոնից, որտեղ կողմերը իրականացւելիք խորհրդակցութիւններից եւ բանակցային գործընթացի ապագայ ուղեգծի վերաբերեալ առանցքային կէտերը քննարկելու եւ յաջորդ փուլերին պատրաստւելու որոշում կընդունեն»։

Օմանի պետական հեռուստատեսութեանը տւած հարցազրոյցում ԱԳ նախարարը շնորհակալութիւն Է յայտնել Օմանի սուլթանին եւ արտաքին գործերի նախարարութեանը՝ բանակցութիւնների հիւրընկալման եւ կազմակերպման համար՝ նշելով.

«Բանակցութիւններն անցկացւեցին դրական մթնոլորտում, եւ երկու կողմերն էլ հնարաւորութիւն ունեցան ներկայացնելու իրենց մտահոգութիւններն ու շահերը՝ հնարաւոր միջուկային համաձայնագրի վերաբերեալ»։

ԻՌՆԱ գործակալութեան հարցին ի պատասխան՝ Արաղչին յստակեցրել է, որ Իրանի եւ ԱՄՆ-ի միջեւ ընթացող երկխօսութիւնը սահմանափակւած է բացառապէս միջուկային հարցով։ Նրա խօսքով՝ իրանական կողմը շեշտել է, որ միջուկային խնդրի շուրջ արդիւնաւէտ բանակցութիւնները պէտք է ընթանան խաղաղ մթնոլորտում՝ առանց սպառնալիքների եւ ճնշումների։ «Սա ցանկացած երկխօսութեան անքակտելի նախապայմանն է»,- ընդգծել է նա։

Օմանի արտաքին գործերի նախարար Բադր ալ-Բուսայիդին իր հերթին բանակցութիւնները գնահատել է որպէս «օգտակար»՝ նշելով, որ դրանք հնարաւորութիւն տւեցին իրանական եւ ամերիկեան կողմերին յստակ ներկայացնելու իրենց դիրքորոշումներն ու պատկերացումները, ինչպէս նաեւ ուրւագծելու հնարաւոր առաջընթացի ուղիները։

Ալ-Բուսայիդին յայտնել է, որ Օմանը կը շարունակի իր միջնորդական դերակատարութիւնը՝ նպատակ ունենալով ապահովել բանակցութիւնների վերսկսումը համապատասխան ժամանակին, այն բանից յետոյ, երբ Մասկատում ձեռք բերւած արդիւնքները մանրակրկիտ ուսումնասիրւեն Թեհրանում եւ Վաշինգտոնում։

Աղբիւրի համաձայն, միեւնոյն օրը ԱՄՆ նախագահ Դոնալդ Թրամփը լրագրողների հետ զրոյցում յայտարարել է. «Մենք Իրանի հետ լաւ բանակցութիւններ ենք ունեցել։ Նրանք իսկապէս ցանկանում են համաձայնութեան հասնել»։

Թրամփի խօսքով՝ Իրանը «լրջօրէն է շահագրգռւած համաձայնագրի հարցում», սակայն «պէտք է տեսնել, թէ այդ համաձայնութիւնն ինչ բովանդակութիւն եւ ձեւաչափ կը ստանայ»։