«ԱԼԻՔ» – Արտգործնախարար Սէյէդ Աբբաս Արաղչին, Բաքւում իր գրքի՝ «Ուժը բանակցութեան մէջ» ազերերէն թարգմանութեան շնորհանդէսին, անդրադառնալով ԱՄՆ-ի եւ Իսրայէլի կողմից Իրանի դէմ իրականացւած 12-օրեայ պարտադրեալ պատերազմին, նշել է, որ Իրանը պէտք էր ապացուցէր՝ պատերազմով չես կարող քաղաքական նպատակներ պարտադրել: Այս մասին է տեղեկացնում «Թասնիմ»-ը:
Արաղչի նշել է նաեւ, որ 2025-ի սկզբին Վաշինգտոնը բանակցութեան առաջարկ ներկայացրեց՝ մայիս-յունիս ամիսներին իր եւ Վիթքոֆի միջեւ հինգ փուլ բանակցութիւն տեղի ունեցաւ։ Սակայն նոր շրջանի մեկնարկից երկու օր առաջ Իսրայէլը ռազմական գործողութիւն սկսեց Իրանի դէմ: Իսկ քանի օր անց գործողութեանը միացաւ նաեւ ԱՄՆ-ը՝ «կրակ» արձակելով բանակցութեան սեղանի վրայ»։
Արաղչին, խօսելով բանակցութեան հզօրութեան մասին, նշել է, որ այն երեք հիմնական ճակատ ունի. «Առաջինն այն կամքն է, որ իւրաքանչիւր երկիր պէտք է ունենայ, որպէսզի կարողանայ բանակցել։ Երկրորդը երկրի այն ուժն է, որի կարիքն ունի բանագնացը։ Իսկ երրորդն այն ուժն է, որը բանակցութիւնների արդիւնքում է գոյանում երկրի համար»։
Արաղչին վերադառնալով 12-օրեայի փաստին, ընդգծել է, որ 12-օրեայ պատերազմի ընթացքում ռազմական ուժն ու դիւանագիտութիւնը գործեցին համահունչ եւ նշել, որ ուժեղ հրթիռային պատասխանների շնորհիւ թշնամին ստիպւած եղաւ ընդունել «անպայմանական հրադադար»:
Մեր կողմից նշենք, որ Իրանի որոշ ԶԼՄ-ների պնդմամբ, Բաքուն 12-օրեայի ընթացքում չի որդեգրել չէզոք դիրք՝ պաշտպանելով Իսրայէլի տարածաշրջանային նկրտումները, յատկապէս, Գազայի պատերազմի ընթացքում եւ դրանից յետոյ: Սակայն Բաքուն առանց փաստարկներ ներկայացնելու հերքել է այդ մեղադրանքները:
