Գէորգի Ասատրեան. «Գլոբալիստ դեմոկրատների վրայ յոյս դրած յետխորհրդային երկրների էլիտան պարտւեց»

«ԱԼԻՔ» – Համաշխարհային ռազմական տնտեսութեան եւ ռազմավարութեան ինստիտուտի գիտաշխատող, «Միջազգային գործերի ռուսական խորհրդի» փորձագէտ Գէորգի Ասատրեանը Alpha News-ի հետ զրոյցում խօսել է Ռուսաստանի եւ ԱՄՆ-ի միջեւ բանակցութիւններից, եւ ինչպէս դա կանդրադառնայ միջազգային ասպարէզում:

Փորձագէտի կարծիքով՝ ԱՄՆ նախագահ Դոնալդ Թրամփը չի կիսում այն դիրքորոշումները, որոնք ունեն գլոբալիստները, ուստի ցանկանում է կարգաւորել յարաբերութիւնները Ռուսաստանի հետ։

«Ինչպէս ասում են բանակցող կողմերը, առայժմ ամէն ինչ դրական է ընթանում։ Շատ բան, իհարկէ, կախւած կը լինի երկու երկրների առաջնորդների հանդիպումից։ Ռուսաստանում, մեծ հաշւով, առաջնագծում ամէն ինչ կարգին է, իսկ տնտեսութիւնը կայունացել է, կայ մօտ 4 տոկոս տնտեսական աճ։ Ասիայի, Աֆրիկայի, Արեւելքի երկրների հետ ամէն ինչ բաւականին դրական է։ Ուստի այս բանակցային գործընթացը սկսել են ամերիկացիները, ուզում են որոշակի առաջարկ անել, ռուսական կողմը լսում է նրանց, ինչ-որ բանի հետ համաձայն է, ինչ-որ բանի հետ՝ ոչ։ Ժամանակը ցոյց կը տայ, թէ ինչպէս եւ ուր կը գնայ այս ամէնը։

Թրամփը չի կիսում այն դիրքորոշումները, որոնք ունի լիբերալ գլոբալիզմը՝ ԱՄՆ դեմոկրատական կուսակցութիւնը։ Սրանք նրա հիմնական թշնամիներն են։ Արեւմտեան կոալիցիան՝ արեւմտեան երկրների համայնքը, միասնական չէ։ Կայ լիբերալ գլոբալիստների ցանց, որը ստեղծւել է տասնամեակների ընթացքում, շատ հզօր ցանց, որը ներկայացւած է երկրների ղեկավարների կողմից: Այստեղ Մակրոնը (Ֆրանսիայի նախագահը) նման էլիտար խմբի ներկայացուցչի վառ օրինակ է։

Դոնալդ Թրամփը պահպանողական է, նա այդ գաղափարների կողմնակից չէ, այլ հակառակը՝ հակառակորդ։ Նա բացարձակապէս չի կիսում դրանք եւ փորձում է կառուցել իր ռազմավարութիւնը, աշխարհի իր տեսլականը։ Նա հզօր դաշնակիցներ ունի ԱՄՆ-ի ներսում եւ դրսում, այդ թւում՝ Եւրոպայում։ Այդ առումով ԱՄՆ-ի ներսում մի տեսակ սառը, քաղաքացիական առճակատում է ընթանում»,- ասել է Ասատրեանը։

Փորձագէտի կարծիքով՝ ԱՄՆ-ում Ուկրաինայի պատճառով Ռուսաստանի հետ կոնֆլիկտի պատճառ չեն տեսնում։

«Թրամփն ի սկզբանէ, երբ այդ հակամարտութիւնը սկսւում էր, դէմ էր դրան, քանի որ նրանք չեն հաւատում Ուկրաինայի առասպելական յաղթանակին, նրանք պատճառ չեն տեսնում, որ գլոբալ Արեւմուտքն աջակցի Ուկրաինային այս հակամարտութիւնում։ Իսկ Թրամփը բազմիցս յայտարարել է այդ ամէնը, դա նրանց բացայայտ դիրքորոշումն է։

Իսկապէս, նրանք Ուկրաինայի հարցով Ռուսաստանի հետ կոնֆլիկտի պատճառ չեն տեսնում։ Նրանք Բայդէնի (ԱՄՆ նախկին նախագահ) եւ Ուկրաինայի դեմոկրատների աջակցութեամբ այս ամբողջ պատմութիւնը համարում են բացարձակապէս անիմաստ քաղաքական քայլ։ Նրանք կարող են նոյնիսկ տեսականօրէն ճանաչել Ռուսաստանի ազդեցութեան գօտին յետխորհրդային տարածքում։ Նրանք մօտ են դասական նէոռեալիստներին, որոնք համակրում են Ռուսաստանին եւ այլ ուժեղ պահպանողական երկրներին։

Ինչ վերաբերում է աշխարհաքաղաքական մրցակցութեանը, ապա ոչ ոք այն չի չեղարկել։ Ոչ ոք չի ասում, որ նրանք ընկերներ կամ մտերիմ գործընկերներ են: Բայց ուկրաինական այս գործը նրանք տեսնում են որպէս բացարձակապէս ձախողւած պատմութիւն: Իսկ Թրամփը միայն վերջերս է յայտարարել, որ դա զուտ փողի պատճառով է։ Սա լւացքի մեծ գրասենեակ է, որտեղ հարիւրաւոր միլիարդաւոր դոլարներ են գնում ԱՄՆ բիւջէից: Թրամփի եւ նրա շրջապատի գլխաւոր թշնամին, ինձ թւում է, լիբերալ գլոբալիստներն ու դեմոկրատներն են»,- նշել է Ասատրեանը։

Փորձագէտի կարծիքով՝ յետխորհրդային երկրների էլիտաները, որոնք խաղադրոյք էին կատարում գլոբալիստ դեմոկրատների վրայ, պարտւել են։

«Այդ երկրների քաղաքական էլիտաները պարտւել են, քանի որ նրանք չեն կարողացել որակապես վերլուծել միջազգային օրակարգը, իրավիճակը, եւ ընդհանուր առմամբ նրանց ոչ այնքան պայծառ ապագայ է սպասւում, քանի որ Թրամփը վստահօրէն յաղթել է, նա գիտի, թէ որ էլիտաներն են իրեն աջակցել, իսկ որոնք՝ ոչ։ Ստացւում է այնպէս, որ հիմա Սպիտակ տան ղեկավարը հեռարձակում է այն գաղափարները, այն թէզերը, որոնք վերջին երեք տարիների ընթացքում հեռարձակել է Ռուսաստանը։ Ես նկատել եմ եւ շարունակում եմ ինչ-որ չափով հետեւել, որ ԱՊՀ որոշ երկրներ այդ թէզերը ծաղրել են, եւ հիմա դրանք յայտնւել են կոտրած տաշտակի առջեւ, եւ սկզբունքօրէն նրանց սպասւում է ոչ այնքան խոստումնալից քաղաքական ապագայ»,- եզրափակել է Ասատրեանը։