Իշխան Սաղաթէլեան. «Ստորագրւած փաստաթղթերը չունեն վերջնական իրաւական ուժ»

«ԱԼԻՔ» – ՀՅԴ Հայսատանի ԳՄ ներկայացուցիչ, ՀՀ ԱԺ «Հայաստան» խմբակցութեան պատգամաւոր Իշխան Սաղաթէլեանի կարծիքով՝ նախօրէին Վաշինգտոնում ստորագրւած փաստաթղթերը չեն կարող ունենալ վերջնական իրաւական ուժ: Այս մասին նա գրել է իր ֆէյսբուքեան էջում:

 

«Ի՞նչ ստացաւ Ադրբեջանը Վաշինգտոնի եռակողմ բանակցութիւններից.

1- ստացաւ ՀՀ համաձայնութիւնը` լուծարելու ԵԱՀԿ Մինսկի խումբը, դրանով փորձելով արձանագրել, որ ԼՂՀ հակամարտութիւն գոյութիւն չունի,

2- կասեցւեց Ադրբեջանի դէմ գործող 907-րդ բանաձեւը, որը սահմանափակում էր ԱՄՆ-ի կողմից Ադրբեջանին ռազմական օժանդակութիւնը,

3- Հայաստանը պարտաւորւեց իր տարածքով ապահովել անխոչընդոտ կապ Ադրբեջանի եւ Նախիջեւանի միջեւ եւ դրանով «Զանգեզուրի միջանցք»-ի գաղափարը մտաւ միջազգային օրակարգ։

 

Ի՞նչ չստացաւ Հայաստանը.

1- Ադրբեջանի զօրքերը դուրս չբերւեցին ՀՀ ինքնիշխան տարածքից,

2- գերիները շարունակելու են մնալ պատանդառւած Բաքւի բանտերում,

3- արցախահայերի վերադարձի հարցը չշօշափւեց, աւելին, Փաշինեանը հերթական անգամ լեգիտիմացրեց Արցախում տեղի ունեցած էթնիկ զտումը։

 

Այս ամէնի դիմաց Հայաստանը ստացաւ.

1- մինչ այս պահը գաղտնի պահւող, նախապայմաններով ու շանտաժներով լեցուն «Խաղաղութեան» պայմանագրի նախաստորագրում, Թրամփի խոստում. եթէ խնդիրներ ունենաք զանգէք, կը լուծեմ,

2- Հայաստանը ներքաշւեց խորքային խնդիրների մէջ Իրանի եւ ՌԴ-ի հետ՝ իրենց բոլոր հետեւանքներով։

 

Ի՞նչ ստացաւ Նիկոլ Փաշինեանը.

1- ժողովրդին կրկին խաբելու, «խաղաղութեան» եւ «իրական Հայաստան» թէզերով կերակրելով՝ իր վերարտադրութիւնը ապահովելու հնարաւորութիւն։

 

Այժմ անելիքների մասին

Փաստ է, որ Ադրբեջանը նոր զիջումներով չի բաւարարւել, ստորագրումից անմիջապէս յետոյ առաջ է քաշում ՀՀ Սահմանադրութեան փոփոխութեան պահանջը, իսկ Փաշինեանը յայտարարում է, որ ՀՀ տիրապետութեան տակ կան ադրբեջանական տարածքներ, որոնք պէտք է վերադարձւեն։

Ուստի,

Վաշինգտոնի գագաթնաժողովով գործընթացը չի աւարտւել, սա ընդամէնը սկիզբն է, ամէն ինչ դեռ առջեւում է։

Յուսալքութիւնը թշնամական օրակարգ է, պայքարից հրաժարւելը կամ համակերպւելը` երաշխաւորւած կործանում։

Ուրեմն, ներընդդիմադիր դաշտում մեղաւորներ փնտրելու, իրար վրայ ցեխ շպրտելու փոխարէն պէտք է գրագէտ եւ հետեւողական աշխատել մեր ժողովրդի հետ, ներկայացնել իրականութիւնը եւ թոյլ չտալ, որ ՔՊ-ական խունտան իր հերթական դաւաճանութիւնը ժողովրդին մատուցի իբրեւ ձեռքբերում:

Երէկ ստորագրւած փաստաթղթերը չունեն վերջնական իրաւական ուժ, Փաշինեանի վերարտադրութիւնը կանխելու եւ ՀՀ Սահմանադրութեան փոփոխութիւնը թոյլ չտալու միջոցով մենք կարող ենք խուսափել սպասւող աղէտից:

Ուստի, դա պէտք է լինի առաջիկայում ազգային ուժերի հիմնական օրակարգը»,- գրել է նա։