«Մայր Հայաստան» դաշինք. «Ներկայացւած մեղադրանքն աբսուրդի ժանրից է եւ ցոյց է տալիս փաշինեանական իշխանութեան իրական էութիւնը»

«ԱԼԻՔ» –  «Մայր Հայաստան» դաշինքը յայտարարութիւն է տարածել քաղաքական գործիչ, ՀՀ ԱԺ նախկին պատգամաւոր Ռուբէն Յակոբեանի ապօրինի կալանաւորման վերաբերեալ:

Յայտարարութեան մէջ ասւած է.

«Հայաստանի օրւայ իշխանութեան պարագլխի կողմից շարունակւում են ապօրինի յարձակումները քաղաքական ընդդիմախօսների դէմ:

Նիկոլ Փաշինեանին ենթակայ իրաւապահ համակարգի եւ դատաւորի ձեռամբ գործ է յարուցւել եւ երկամսեայ կալանքի որոշում է կայացւել քաղաքական գործիչ, ԱԺ մի քանի գումարումների պատգամաւոր, 2000-2008 թթ. ՌԴ-ում ՀՀ գլխաւոր հիւպատոս Ռուբէն Յակոբեանի մասով:

Յակոբեանի «յանցագործութիւնը» Հ2 հեռուստաընկերութեան եթերում Նիկոլ Փաշինեանի վարած քաղաքականութեան քննադատութիւնն է: Ներկայացւած մեղադրանքն աբսուրդի ժանրից է եւ ցոյց է տալիս փաշինեանական իշխանութեան իրական էութիւնը:

«Մայր Հայաստան»-ը խստօրէն դատապարտում է օրւայ իշխանութեան հակաիրաւական գործունէութիւնը եւ շարունակելու է պայքարը իրաւական «բեսպրեդելի» (ամենաթողութիւն-ԽՄԲ. ) դէմ:

Մենք կոչ ենք անում հանրութեանը միասնական ջանքերով յաղթահարել մեր երկրին սպառնացող ներքին ու արտաքին մարտահրաւէրները:

19.07.2025թ.»: