Վեհափառն ընդունել է «Մեր ձեւով» շարժման ներկայացուցիչներին
«ԱԼԻՔ» – Օգոստոսի 30-ին, Ն․Ս․Օ․Տ․Տ․ Գարեգին Բ Ամենայն Հայոց կաթողիկոսն ընդունել է Մայր Աթոռ Սուրբ Էջմիածին ուխտաւորաբար այցելած «Մեր ձեւով» ժողովրդական կամաւորական շարժման համակարգող խորհրդի անդամներին։ Այս մասին յայտնում են Մայր Աթոռի տեղեկատւական համակարգից։
Հանդիպմանը շարժման համակարգող Նարեկ Կարապետեանը Ամենայն Հայոց կաթողիկոսին ներկայացրել է շարժման հիմնական նպատակներն ու գործունէութեան առաջնահերթութիւնները՝ միտւած հայրենական կեանքում առկայ հիմնախնդիրների յաղթահարմանը։
Ամենայն Հայոց կաթողիկոսն իր օրհնութիւնն է փոխանցել շարժման ներկայացուցիչներին եւ գոհունակութիւն է յայտնել, որ շարժումը պիտի գործի ազգային բարերար Սամուէլ Կարապետեանի գաղափարներով՝ ի նպաստ երկրի զարգացման ու առաջընթացի՝ ցաւով անդրադառնալով նաեւ, որ նա շարունակում է ապօրինաբար ազատազրկւած մնալ ի պաշտպանութիւն Հայոց Եկեղեցու դրսեւորած իր նախանձախնդիր ոգու համար։
Հայրենիքի առջեւ ծառացած ներքին եւ արտաքին մարտահրաւէրների դիմագրաւման համար Նորին Սրբութիւնն առաջնային եւ հրամայական է նկատել ազգային միասնականութեան ամրապնդումը եւ աշխարհասփիւռ հայ ժողովրդի ներուժի համախմբումը։ Այս առումով Վեհափառ Հայրապետը կարեւորել է համագործակցութիւնը ազգային եւ հոգեւոր կառոյցների հետ։
Ամենայն Հայոց կաթողիկոսը նաեւ իր գնահատանքն է յայտնել Հայաստանեայց Առաքելական Սուրբ Եկեղեցուն ցուցաբերւող զօրակցութեան, շարժման ռազմավարութեան շրջանակներում ազգային եւ հոգեւոր արժէքների, ընտանիքի ինստիտուտի զօրացմանն ուղղւած առանձնայատուկ ուշադրութեան համար։
Հանդիպման աւարտին Հայոց Հայրապետը մաղթել է տիար Սամուէլ Կարապետեանին շուտափոյթ վերադարձ ընտանեկան օջախ՝ ընդգծելով, որ Մայր Աթոռը պիտի շարունակի կարելին ի գործ դնել բարերար տիար Սամուէլ Կարապետեանի եւ Միքայէլ ու Բագրատ արքեպիսկոպոսների ազատ արձակման ուղղութեամբ։ Նորին Սրբութիւնն ազգօգուտ ու արդիւնաւոր առաքելութիւն է ցանկացել շարժման ներկայացուցիչներին։
