Իշխան Սաղաթէլեան. «Անկիւնաքարային հարցերի վերաբերեալ առկայ է փոխըմբռնում»
«ԱԼԻՔ» – «Քաղաքական ուժերի հետ խորհրդակցութիւնների շրջանակներում նախորդ շաբաթ հանդիպումներ ենք ունեցել ՀՀԿ, «Ազատութիւն», «Հայրենիք» կուսակցութիւնների ղեկավարների, ինչպէս նաեւ հասարակական շրջանակների ներկայացուցիչների, իրաւապաշտպանների եւ փաստաբանների հետ»: Այս մասին ֆէյսբուքեան իր էջում գրել է ՀՅԴ Հայաստանի ԳՄ ներկայացուցիչ, ՀՀ ԱԺ պատգամաւոր Իշխան Սաղաթէլեանը:
Նա նշել է, որ քննարկել են մի շարք օրակարգային խնդիրների շուրջ համագործակցութիւն ձեւաւորելու վերաբերեալ հարցեր։
«Ընդհանուր առմամբ, անկիւնաքարային հարցերի վերաբերեալ առկայ է փոխըմբռնում:
Առաջիկայում կը շարունակւեն քննարկումները քաղաքական, հասարակական դաշտի դերակատար ուժերի հետ:
Յ. Գ. – Յիշեցնեմ, որ ԱԺ-ում կայացած խորհրդարանական լսումների ժամանակ քաղաքական ուժերին առաջարկել էինք սկսել քննարկումներ հետեւեալ օրակարգային հարցերի շուրջ.
- Օրինական բոլոր միջոցներով հակազդեցութեան ձեւաւորում բռնաճնշումների, քաղաքական հետապնդումների եւ ազատութիւնների սահմանափակումների նկատմամբ,
- Հայ Առաքելական Եկեղեցու եւ ազգային արժէքների պաշտպանութիւն,
- քաղբանտարկեալների իրաւունքների պաշտպանութիւն՝ որեւէ քաղբանտարկեալ բոլորիս քաղբանտարկեալն է սկզբունքով,
- ընտրական գործընթացի օրինականութեան ապահովում եւ վերահսկողութեան իրականացում,
- միմեանց նկատմամբ հակաքարոզչութեան բացառում,
- վարչախմբի հետ ցանկացած (այդ թւում հետընտրական փուլում) համագործակցութեան բացառում»,- յաւելել է Իշխան Սաղաթէլեանը։
