Եպիսկոպոսաց ժողովի կանոնականութիւնը որեւէ կերպ չի պայմանաւորւում գումարման վայրով
Մայր Աթոռ Սուրբ Էջմիածինը «խորապէս ցաւ է ապրում հակաեկեղեցական արշաւին ու դրանում ներգրաււած կարգալոյծներին համախորհուրդ տասը եպիսկոպոսների որդեգրած պառակտիչ ընթացքի համար»։
Տարածւած յայտարարութեան մէջ նշւում է, որ Հայաստանի վարչապետի նախաձեռնած շարժմանը հարող եպիսկոպոսներին ուղղւած յորդորներն ու հրաւէրները մինչեւ այսօր մնացել են անպատասխան եւ անտեսւել են կանոնական դաշտ վերադառնալու, խնդիրները եկեղեցական ատեաններում քննելու առաջարկները։
«Միեւնոյն ժամանակ թէ՛ անցեալում, թէ՛ առաւել եւս այսօր յիշեալ եպիսկոպոսների կողմից որեւէ կերպ չէն մատնանշւել իրատեսական ճանապարհները Եկեղեցու եւ իշխանութիւնների միջեւ յարաբերութիւնների կարգաւորման ուղղութեամբ, ընդհակառակը՝ ակնյայտ ազդեցութեան ներքոյ շարունակ փորձեր են կատարում խնդիրները հանգուցալուծելու ոչ կանոնական դատապարտելի ուղիներով։
Անընդունելի է կասկածի տակ դնել եկեղեցական մարմինների իրաւազօրութիւնը, որոնց աշխատանքներին տասնամեակներ շարունակ յիշեալ եպիսկոպոսներից շատերը իրենց մասնակցութիւնն են բերել, որոշումներ ընդունել եւ պատասխանատուութիւն ստանձնել Եկեղեցու գործունէութեան հետ առնչւած։ Այս կապակցութեամբ անհրաժեշտ պարզաբանումներ արդէն իսկ պաշտօնապէս տրւել են։
Իշխանութիւնների հակասահմանադրական քայլերի հետեւանքով ստեղծւած մտահոգիչ իրավիճակի յաղթայարման ճանապարհներից է նաեւ հրաւիրեալ Եպիսկոպոսաց ժողովը, որի կանոնականութիւնը որեւէ կերպ չի պայմանաւորւում գումարման վայրով։ Եկեղեցական կեանքը յուզող կարեւորագոյն հարցերը, այդ թւում՝ բարձրաձայնւող խնդիրները, պէտք է քննութեան առնուէն եւ պատշաճ լուծումներ գտնէն Եկեղեցու ընկալեալ կարգի համաձայն, բացառապէս եկեղեցական ժողովական մարմիններում։ Հարկ չկայ կանխակալ տրամադրութիւններ ձեւաւորել եւ հիմնազուրկ պատճառաբանութիւններով ու կեղծ մեղադրանքներով փորձել ձախողել ժողովի գումարումը արտերկրում, երբ ակնյայտ են եկեղեցականութեան հանդէպ Հայաստանում տարատեսակ բռնաճնշումները։
Եկեղեցական կեանքի վերանորոգումը եւ զօրացումը շարունակական գործընթաց է, որը պահանջում է աղօթական միութիւն, տեւական ու միասնական աշխատանք եւ ուխտապահութիւն»,- ասւում է Մայր Աթոռի յայտարարութիւնում:
Աւելի վաղ յայտնի էր դարձել, որ Ամենայն Հայոց Կաթողիկոսի հրաւէրով Եպիսկոպոսաց ժողովը տեղի կ’ունենայ Աւստրիայի Սանկտ Փէօլթըն քաղաքում՝ փետրւարի 16-ից 19-ը:
