«ԱԼԻՔ» – Իրանում տիրող պատերազմական իրավիճակը փոխել է նաեւ կենցաղային բնականոն ընթացքը։ Այն աստիճան, որ քաղաքային համայնապատկերներից սովորական լուսանկարներ անելն անգամ կարող է դիտւել որպէս կասկածելի կամ նոյնիսկ լրտեսական գործողութիւն, մանաւանդ երբ անվտանգութեան մարմինների կողմից հանրութեանը տարբեր միջոցներով զգուշացումներ են հնչեցւել այդ մասին։
«ԱԼԻՔ»-ին յաջողւել է պարզել երկու դէպք, երբ անվտանգութեան ուժերի կողմից ձերբակալւել են թեհրանահայ քաղաքացիներ։ Առաջին դէպքում երիտասարդ թեհրանահայը ձերբակալւել է մայրաքաղաքի Կենտրոն համայնքում՝ ռմբակոծութեան հետեւանքով աւերակ դարձած շէնքը լուսանկարելու պահին։ Երկրորդ դէպքը կապւած է Թեհրանի մէկ այլ շրջանում թեհրանահայ տղամարդու հարցաքննութեան հետ, ով փորձել էր լուսանկարել նախորդ օրը ռմբակոծւած շէնքը։ Նա մեզ պատմեց, որ ինքն այդ վայրում է գտնւել այն պահին, երբ ռումբերը թափւել էին, իսկ յաջորդ օրը վերադարձել էր՝ լուսանկարելու այն տեղը, որտեղ, իր խօսքերով, «չի սպանւել»։
Երկու դէպքում էլ մեր հայրենակիցները կարճ ժամանակ անց ազատ են արձակւել․ առաջին դէպքում՝ Ազգային իշխանութեան միջամտութեամբ, իսկ երկրորդում՝ տրւած համոզիչ բացատրութիւններից եւ ձեռքի հեռախօսն ստուգելուց եւ այն ամբողջութեամբ «մաքրելուց» յետոյ։
Հարկ է յիշեցնել, որ ստեղծւած պայմաններում անհրաժեշտ է զերծ մնալ կասկած հարուցող ցանկացած գործողութիւնից։ Նշենք նաեւ, որ նոյնիսկ «ԱԼԻՔ»-ի արտօնեալ լուսանկարչին չի թոյլատրւել գտնւել դէպքի վայրում։
Համապատասխան յայտարարութեան մէջ յատկապէս նշւում է.
«Հաշւի առնելով, որ թշնամի յանցագործ ուժերին առնչւող որոշ վարձկաններ իրենց առջեւ խնդիր են դրել լուսանկարել թշնամու վայրագ յարձակումներից վնասւած վայրերը եւ այդ պատկերներն ուղարկել իրենց «տէրերին», յօրդորում ենք նման դէպքեր նկատելու պարագայում անմիջապէս տեղեկացնել կարգապահական եւ անվտանգութեան մարմիններին»։
