Յակոբ Բադալեան. «Սէյրան Օհանեանը յայտարարեց, թէ ում իրաւասութեան ներքոյ է եղել դէպի Շուշի ճեղքւած ճակատը»

Քաղաքական մեկնաբան Յակոբ Բադալեանը գրում է.

«Պէտք է նկատել, որ Նիկոլ Փաշինեանը նախօրէին կարողացաւ իրեն բնորոշ հմտութեամբ շեղել հանրային ուշադրութիւնը խորհրդարանում կառավարութեան ծրագրի կատարման հաշւետւութիւնից, այդ հաշւետւութիւնը ուղեկցելով ընդդիմութեան ուժերի եւ նրանց աջակցող հանրութեան հասցէին այնպիսի արտայայտութիւներով, որոնք լցրեցին ինֆորմացիոն հոսքերը:

Այդ հարցում Փաշինեանի հմտութեան անգերազանցելիութիւնը կարծես թէ վեր է կասկածից:

Մինչդեռ, օրինակ նոյն խորհրդարանում նախօրէին եղաւ թերեւս մի աննախադէպ ելոյթ՝ «Հայաստան» խմբակցութեան ղեկավար, պաշտպանութեան նախկին նախարար Սէյրան Օհանեանի ելոյթը: Աւելին, ըստ իս, խորհրդարանական հնգամեայ գործունէութեան ընթացքում դա Օհանեանի թերեւս ամենաարդիւնաւէտ եւ յաջողւած ելոյթն էր:

Իսկ աննախադէպ էր այն հանգամանքի բերումով, որ կարծես թէ առաջին անգամ Սէյրան Օհանեանը յայտարարեց, որ 44-օրեայ պատերազմում ճակատի ճեղքումն ու առաջխաղացումը դէպի Շուշի, տղի է ունեցել այն հատւածում, որը եղել է ոչ թէ Արցախի ՊԲ, այլ Հայաստանի գլխաւոր շտաբի եւ ըստ այդմ Գերագոյն գլխաւոր հրամանատարի այսպէս ասած իրաւասութեան ու տնօրինման ներքոյ, ըստ հաստատւած կառավարման կարգի:

Այլ կերպ ասած, Սէյրան Օհանեանը ազդարարում է, որ 44-օրեայ պատերազմի ընթացքում տապալումը եղել է Հայաստանի ռազմա-քաղաքական ղեկավարութեան անմիջական պատասխանատւութեան ներքոյ գտնւող գօտում, հետեւաբար պատերազմի հետեւանքի համար պատասխանատու եւ մեղաւոր շրջանակը հէնց այդտեղ է:

Սա իսկապէս շատ լուրջ քաղաքական յայտարարութիւն է, որպիսին, կրկնեմ, չեմ յիշում թէ եղել է մինչ այժմ: Մամուլի, պատերազմի մասնակիցների տարբեր գնահատականների, տարբեր մեկնաբանական կամ վերլուծական դիտարկումների շրջանակում՝ գուցէ, թերեւս, բայց որ խորհրդարանի խմբակցութեան ղեկավարը անի այդպիսի ուղիղ յայտարարութիւն, ինքս յամենայն դէպս չեմ յիշում:

Այստեղ էլ հասկանալի է, թէ ինչո՞ւ էր Փաշինեանին պէտք բոլորովին այլ թեմայով կրակը վերցնել իր վրայ: Եւ ինչու՞ էր դա պէտք իշխող խմբակցութեան տարբեր այլ ներկայացուցիչների:

Ահա հէնց այս առումով է, որ արդէն տեւական ժամանակ պարբերաբար արտայայտում եմ այն միտքը, որ գործող իշխանութիւնն անելու է առաւելագոյնը՝ ընտրական պրոցեսի առաջատար մասնակիցներին «շեղելու» եւ աւանդական «սեւ-սպիտակ» սխեմայի դաշտ բերելու համար: Այդ դաշտում է ներկայիս իշխանութեան «յարատեւութեան» գրաւականը, որը մեծագոյն ռիսկ է Հայաստանի հանրապետութեան համար:

Մինչդեռ, ընդդիմադիր ուժերի առաւելութիւնը ներկայումս այն է, որ նրանք վերջապէս կարողացել են դուրս գալ «սեւ-սպիտակ» դիմակայութեան դաշտից եւ պարզապէս իշխանութեան հետ կռւելու փոխարէն, աշխատանքի ծանրութեան կենտրոնը տեղափոխել են հանրութեան հետ ուղիղ աշխատանքի եւ երկխօսութեան դաշտ: Սրան նպաստող առանցքային գործօն, ինչպէս առիթ եմ ունեցել ասելու, եղել է Սամուէլ Կարապետեանի մուտքը պրոցես: Դա բերել է լիովին նոր իրավիճակ, որի ներքոյ նաեւ դիրքաւորւել են միւս ուժերը:

Եւ սա է, որ այսպէս ասած նախաձեռնութեան կորստի տագնապալի զգացում է առաջացրել կառավարող քաղաքական ուժի շրջանում: Հետեւաբար, այդ էպատաժային՝ թւում է թէ նեարդային պոռթկումները, իրականում միանգամայն հաշւարկւած եւ պլանաւորւած քայլեր են նախաձեռնութիւնը վերադաձնելու ուղղութեամբ:

Ահա այստեղ է ներկայումս պայքարի «մեխը»»:

Yerkir.am