Ղարիբաբադի. ՄԱԳԱՏԷ-ն չպէտք է տեխնիկական զեկոյցները վերածի Իրանի դէմ քաղաքական ճնշման գործիքի
Իրանի արտաքին գործերի նախարարութեան իրաւական եւ միջազգային հարցերի փոխնախարարը, քննադատելով Ատոմային էներգիայի միջազգային գործակալութեան վերջին զեկոյցը եւ կազմակերպութեան գլխաւոր տնօրէնի դիրքորոշումները Իրանի միջուկային ծրագրի վերաբերեալ, ընդգծել է, որ Գործակալութիւնը պէտք է խուսափի իրանական միջուկային հարցը քաղաքականացնելուց, եւ ճնշում գործադրելու փոխարէն քայլեր ձեռնարկի հարցերի դիւանագիտական լուծման ուղղութեամբ։
ParsToday-ի փոխանցմամբ՝ Քազեմ Ղարիբաբադին, ի պատասխան Իրանի միջուկային օբիեկտների եւ ուրանի պաշարների կարգավիճակի վերաբերեալ Ռաֆայէլ Գրոսսիի յայտարարութիւններին, ասել է, որ առկայ խնդիրները առաջացել են ԱՄՆ-ի եւ սիոնիստական ռեժիմի կողմից ՄԱԳԱՏԷ–ի վերահսկողութեան ներքոյ գտնւող միջուկային օբիեկտների վրայ յարձակումների հետեւանքով։ Նա յաւելել է, որ Գործակալութեան գլխաւոր տնօրէնը մինչ օրս չի դատապարտել այդ յարձակումները, եւ որ այդ գործողութիւնների հետեւանքները չեն կարող անտեսւել, եւ այդ նոյն հետեւանքները կարող են օգտագործւել որպէս հիմք Իրանի դէմ մեղադրանքներ ներկայացնելու համար։
Ղարիբաբադին նաեւ քննադատել է Գործակալութեան քաղաքական մօտեցումը եւ ընդգծել, որ 60 տոկոս հարստացման հարցը կրկնելը՝ առանց իրաւական շրջանակը հաշւի առնելու, աւելի շատ քաղաքական է, քան տեխնիկական։ Նա պարզաբանեց, որ միջուկային զէնքի չտարածման մասին պայմանագիրը չի սահմանում հարստացման մակարդակի սահմանափակում, եւ հիմնական չափանիշը միջուկային գործունէութիւնը դէպի ռազմական նպատակներ չշեղելն է։
