«SOS Արցախ» Հանրահաւաք՝ ի պաշտպանութիւն Արցախի

Ազատութեան հրապարակում սեպտեմբերի 2-ին, Արցախի Հանրապետութեան Անկախութեան 32-ամեակի առթիւ, մեկնարկեց ընդդիմութեան հանրահաւաքը, որը կրում էր «SOS Արցախ» կարգախօսը:

Հանրահաւաքի նպատակն էր Հայաստանի ու Սփիւռքի միասնական ձայնը հնչեցնել Արցախի ու համայն հայութեան համար այս ծանր ու վճռական փուլում:

Հանրահաւաքի մեկնարկին՝ Հայաստանի ու Արցախի պետական օրհներգերից յետոյ Շուշան Պետրոսեանը կատարեց «Երազի իմ երկիր հայրենի» երգը։

Տէրունական աղօթք եւ օրհնութեան խօսք փոխանցեց Տաւուշի թեմի առաջնորդ Բագրատ արքեպիսկոպոս Գալստանեանը:

Իր խօսքում նա երախտիքի խօսք յղեց Արցախի Անկախութեան համար նահատակւածներին եւ Ազատութեան հրապարակում գտնւող հանրահաւաքի մասնակիցներին։

«Ուզում եմ ողջ սրտով, որդիական սիրով ու խոնարհութեամբ ձեզ բոլորիդ, իմ հոգեւոր եղբայրների հետ միասին, բերել Հայոց հայրապետի, Ամենայն Հայոց կաթողիկոսի՝ Գարեգին Բ հայրապետի օրհնութիւնը, սէրը, ողջոյնը, քաջալերանքը, աղօթքը մեր ողջ կեանքի վերելքների ու յաղթանակների համար։ Վեհափառի օրհնութիւնը, ողջոյններն ու սէրը ձե՛զ՝ սիրելի, իմ շատ սիրելի ժողովուրդ։

Ես յաղթեցի աշխարհին՝ այս խօսքերը հնչեցին մեր տիրոջ կողմից այն ժամանակ, երբ շուրջ բոլորը տրտմութիւն էր, կասկած, յուսահատութիւն, ուրացում, անորոշութիւն, վախ՝ պատւած միայնութեան եւ լքւածութեան զգացումով։ Առջեւում տառապանք էր ու խաչելութիւնը, մարդկային մտքի համար անհասկանալի ու անընդունելի, սակայն այդ է յաղթանակի ու յարութեան ճանապարհը։ Եւ հէնց այս մթնոլորտում է հնչում տէրունական պատգամը։ Աշխարհում դուք նեղութիւն էք կրելու, բայց քաջալերւեցէք, որովհետեւ ես յաղթեցի աշխարհին։ Այս անվերջանալի պատգամը հնչում է նաեւ այսօր»:

Հանրահաւաքին ելոյթներ ունեցան շուշեցի Նարէ Սիմոնեանը, «Հայաքւէ» նախաձեռնութեան համակարգող Աւետիք Չալաբեանը, «Բաբոն տէր ա» նախաձեռնութիւնը, 44-օրեայ պատերազմում զոհւած Վաչագան Մանուկեանի հայրը՝ գրող Խաչիկ Մանուկեանը, քաղաքագէտ Թեւան Պօղոսեանը, 44-օրեայ պատերազմին զոհւած Յակոբ Ռոստոմեանի հայր՝ Արա Ռոստոմեանը, «Մայր Հայաստան» դաշինքի առաջնորդ Անդրանիկ Թեւանեանը, ԱԺ «Պատիւ ունեմ» խմբակցութեան քարտուղար Տիգրան Աբրահամեանը, Ղարաբաղեան շաժման ակունքներում կանգնած, Ղարաբաղ կոմիտէի ղեկավար Վազգէն Մանուկեանը, ՀՅԴ Հայաստանի ԳՄ ներկայացուցիչ Իշխան Սաղաթէլեանը:

Տեսաուղերձով հանրահաւաքի մասնակիցներին իր ողջոյնի խօսքը փոխանցեց ՀՅԴ Բիւրոյի անդամ, Ֆրանսահայ կազմակերպութիւնները համակարգող խորհրդի համանախագահ Մուրադ Փափազեանը:

Այս հանրահաւաքը հերթական հանրահաւաք չէ, այն ունի առաքելութիւն. իր ելոյթում նշեց Իշխան Սաղաթէլեանը։

«Այսօր հայ ժողովուրդը աշխարհի տարբեր կողմերում միջազգային հանրութեանը, մեր բարեկամ, դաշնակից երկրներին ու մեր թշնամիներին շատ յստակ եւ ուղիղ ասում է՝ Հայաստանի իշխանութիւնների մէջտեղ բերած յանձնւելու օրակարգը հայ ժողովրդի օրակարգը չէ, հայ ժողովուրդը մերժում է այդ օրակարգը եւ պատրաստ է շարունակել պայքարը իր հայրենիքի համար»:

Իշխան Սաղաթէլեանը յայտարարեց, որ յաջորդ հանրահաւաքը չի ուշանալու, նշեց, որ իշխանափոխութեան հասնելու շուրջ ընդդիմադիր դաշտում ակտիւ քննարկումներ են ընթանում:

«Սա մէկ հոգու, մէկ անձի որոշելիք չէ, սա արժանապատւութեան, մինչեւ վերջ գնալու պայքար է, մեր յաջորդ հանդիպումը շատ չի ուշանալու, Արցախը երբեք Ադրբեջանի կազմում չի լինելու: Չհիասթափւե՛լ, չյուսահատւե՛լ, չլռե՛լ եւ գնալ մինչեւ վերջ»,- նշեց նա:

Հանրահաւաքն աւարտւեց Շուշան Պետրոսեանի հանրայայտ «Արցախ» երգի կատարմամբ:

Նշենք, որ հանրահաւաքին ներկայ էին նաեւ ՀՀ 2-րդ եւ 3-րդ նախագահներ Ռոբերտ Քոչարեանը եւ Սերժ Սարգսեանը:

«Arfd.am»