Եւրոպացիները յանուն Արցախի նախաձեռնութեան յայտարարութիւնը

Մենք՝ «Եւրոպացիները յանուն Արցախի» նախաձեռնութեան անունից, խոր մտահոգութեամբ եւ վճռականօրէն դատապարտում ենք ՀՀ Ազգային ժողովի իշխող ուժի պատգամաւորի վերջին յայտարարութիւնները՝ ուղղւած Հայկական Սփիւռքին եւ համահայկական շահերը պաշտպանող կառոյցներին։

Սփիւռքի հզօրացումը Հայաստանի թուլացման հետ կապելը ոչ միայն վտանգաւոր սխալ ընկալում է, այլեւ խորապէս բաժանարար մի մօտեցում, որը փորձում է հակադրել հայ ժողովրդի երկու անբաժանելի բաղադրիչները։

Նոյնքան անընդունելի է համահայկական շահերը պաշտպանող կառոյցների աշխատանքը ներկայացնել որպէս Հայաստանի պետական շահերին հակասող երեւոյթ։ Տասնամեակներ շարունակ նրանց աշխատանքը՝ Հայոց Ցեղասպանութեան միջազգային ճանաչումից մինչեւ Արցախի հայութեան իրաւունքների պաշտպանութիւնը, իրականացւել է ի նպաստ հայ ժողովրդի արժանապատւութեան, իրաւունքների եւ համազգային շահերի։

Առանձնայատուկ մտահոգիչ եւ դատապարտելի է նաեւ այսօրւայ իշխանութիւնների որդեգրած վերաբերմունքը Հայոց Ցեղասպանութեան հարցի նկատմամբ, որը դրսեւորում է վտանգաւոր խուսափողականութիւն եւ նսեմացնում է հայ ժողովրդի պատմական յիշողութեան ու արդարութեան պահանջի կարեւորութիւնը։

Հայոց Ցեղասպանութեան միջազգային ճանաչման եւ դատապարտման պայքարը սակարկութեան ենթակայ քաղաքական հարց չէ, այլ հայ ժողովրդի պատմական յիշողութեան, արժանապատւութեան եւ իրաւունքների անբաժանելի մասն է։

Այսօր, երբ Արցախի հայութիւնը ենթարկւել է բռնի տեղահանման, իսկ Արցախի հայկական ժառանգութիւնը գտնւում է լուրջ վտանգի տակ, մենք Հայաստանի պետական ներկայացուցիչներից ոչ թէ Սփիւռքի դէմ ուղղւած յարձակումներ էինք ակնկալում, այլ համազգային համերաշխութիւն եւ Արցախի հարցի արդար լուծման ուղղութեամբ միասնական ջանքեր։

Մենք մերժում ենք այն մտածելակերպը, որ Հայաստանի եւ Սփիւռքի շահերը պէտք է հակադրել իրար։ Ուժեղ Հայաստանը եւ ուժեղ Սփիւռքը հակասութիւն չեն, այլ նոյն ազգային ուժի երկու փոխլրացնող յենասիւներ։

Եւրոպական երկրներում ապրող հայ քաղաքացիներս եւ Հայաստանի բարեկամ մեր եւրոպացի գործընկերները պիտի շարունակենք (կամ՝ շարունակելու ենք) պաշտպանել հայ ժողովրդի իրաւունքները, Արցախի հայութեան վերադարձի իրաւունքը, հայկական մշակութային ժառանգութեան պահպանութիւնը եւ համահայկական շահերը պաշտպանող կառոյցների արդար պահանջները։

Ոչ մի պաշտօնական յայտարարութիւն չի կարող մեզ ստիպել հրաժարւել մեր պատմական յիշողութիւնից, ազգային իրաւունքների պաշտպանութիւնից կամ Արցախի նկատմամբ մեր պատասխանատւութիւնից։

Հայաստանի եւ Սփիւռքի ուժը մէկ ամբողջութեան ուժն է։

«Եւրոպացիները յանուն Արցախի»

25.8.2026 թ.

Կարէն Արեւեան – Անգլիա

Մուրադ Փափազեան – Ֆրանսիա

Կարէն Թադէոսեան – Բելգիա

Նուբար Վարդանեան – Հոլանդիա

Ջոնաթան Շպանգենբերգ – Գերմանիա

Սիմոն Տէր-Սահակեան – Շւեդիա

Նազար Աւագեան – Հունաստան

Վահան Այնեջեան – Կիպրոս

Սահակ Չալըքեան – Բուլղարիա

Ալեքսանդր Սարգսեան – Չեխիա

Բայքար Սւազլեան – Իտալիա

Զարեհ Նազարեան – Ռումինիա

Արարատ Ղուկասեան – Իսպանիա