Վելայաթին՝ Փաշինեանի քաղաքականութեան եւ «Թրամփի ուղու» մասին. Կովկասում վերջին խօսք ասողի դերն Իրանինն է
ԱԳ նախկին նախարար եւ երկրի առաջնորդի միջազգային հարցերով խորհրդական Ալի Աքբար Վելայաթին, «Պրն. վարչապետին՝ անկեղծօրէն» խորագրով հրապարակման մէջ, խիստ քննադատութեան է ենթարկել Հայաստանի վարչապետ Նիկոլ Փաշինեանի քաղաքականութիւնը, յատկապէս տարածաշրջանային անվտանգութեան եւ այսպէս կոչւած «Թրամփի ուղու» հարցում։
«Էթթելաաթ» օրաթերթում հրապարակած յօդւածում Վելայաթին, անդրադառնալով հայ-իրանական պատմական յարաբերութիւններին, նշել է, որ դրանք աւելի քան երկու հազարամեայ պատմութիւն ունեն եւ աւանդաբար եղել են բարեկամական։ Նա նշել է, որ Փաշինեանի արեւմտամէտ քաղաքականութիւնը հակասում է Հայաստանի շահերին եւ կարող է նոր լարւածութիւն առաջացնել Հարաւային Կովկասում։
Գերագոյն առաջնորդի միջազգային հարցերով խորհրդականը, յատկապէս, անընդունելի է համարել «Զանգեզուրի միջանցք»-ի անւանափոխութիւնը «Թրամփի ուղի» (TRIPP) անւամբ եւ յիշեցրել, որ Իրանի առաջնորդը 2021 թւականի Թեհրանում կայացած Աստանայի գագաթնաժողովի ընթացքում յստակօրէն դէմ է արտայայտւել «Զանգեզուրի միջանցք»-ի հետ կապւած նկրտումներին։
Վելայաթին նաեւ ընդգծել է, որ Իրանը, Ռուսաստանի մասնակցութեամբ կամ առանց դրա, իրեն պատասխանատու է համարում Հարաւային Կովկասի անվտանգութեան պահպանման հարցում, յիշեցնելով Իրանի զինւած ուժերի տարածաշրջանում անցկացրած զօրավարժութիւնները։
