Իրանի եւ Հայաստանի միջեւ դատական հագործակցութեան զարգացումը` առեւտրի դիւրացման եւ գործարարների պաշտպանութեան նպատակով

Իրանի արդարադատութեան նախարարը յայտարարել է, որ Թեհրանը պատրաստ է Հայաստանի հետ կնքել համագործակցութեան յուշագրեր՝ իրաւական եւ դատական ոլորտներում գործակցութիւնն ընդլայնելու, ինչպէս նաեւ երկու երկրների գործարարներին եւ տնտեսական գործունէութիւն ծաւալող անձանց աջակցելու նպատակով։
«Միզան» լրատւական գործակալութեան հաղորդմամբ՝ Իրանի արդարադատութեան նախարար Ամին Հոսէյն Ռահիմին, Հայաստանի Քննչական կոմիտէի նախագահ Արթուր Պօղոսեանի եւ նրան ուղեկցող պատւիրակութեան հետ հանդիպման ընթացքում, գործարարների եւ ձեռնարկատէրերի գործունէութեան դիւրացումը համարել է համագործակցութեան կարեւոր ուղղութիւններից մէկը։
Նա նշել է, որ Իրանը պատրաստ է համատեղ յուշագրերի կնքման միջոցով ստեղծել երկու երկրների տնտեսական գործունէութիւն ծաւալող անձանց իրաւական եւ դատական պաշտպանութեան անհրաժեշտ պայմաններ՝ Թեհրանի եւ Երեւանի միջեւ առեւտրատնտեսական յարաբերութիւններն առաւել զարգացնելու նպատակով։
Ռահիմին Իրանի համար կարեւոր համագործակցութեան այլ ուղղութիւնների շարքում նշել է նաեւ քաղաքացիական իրաւունքների, մարդու իրաւունքների եւ փորձի փոխանակման ոլորտները՝ ընդգծելով երկու երկրների միջեւ իրաւական եւ դատական համաձայնագրերի հետեւողական իրականացման անհրաժեշտութիւնը։
Հայաստանի Քննչական կոմիտէի նախագահն իր հերթին, ընդգծելով Թեհրանի եւ Երեւանի միջեւ կառուցողական յարաբերութիւնները, յայտնել է Հայաստանի պատրաստակամութիւնը՝ ընդլայնելու իրաւական եւ դատական համագործակցութիւնը եւ կնքելու համատեղ յուշագրեր։



