Գարեգին Բ կաթողիկոսը Սփիւռքի եկեղեցականներին յորդորեց բարձրաձայնել արցախահայութեան առջեւ ծառացած մարտահրաւէրները
Փետրւարի 19-ին Ն.Ս.Օ.Տ.Տ. Գարեգին Երկրորդ Ծայրագոյն պատրիարք եւ Ամենայն Հայոց կաթողիկոսը Մայր Աթոռ Սուրբ Էջմիածնում հանդիպեց հերթական երեքշաբաթեայ վերապատրաստման դասընթացներին մասնակից քահանաներին, ովքեր ժամանել էին Հայաստանի եւ Սփիւռքի տարբեր թեմերից։
Մայր Աթոռ Սուրբ Էջմիածնի «Գարեգին Ա» կրթական կենտրոնի տնօրէն Տ․ Վահան եպիսկոպոս Յովհաննիսեանը հայցելով Նորին Սրբութեան օրհնութիւնը, տեղեկութիւններ փոխանցեց վերապատրաստման դասընթացների ընթացքի վերաբերեալ։
Այնուհետեւ Նորին Սրբութիւնը, իր հայրական օրհնութիւնը բերելով հոգեւոր հայրերին, կարեւորեց վերապատրաստման այս դասընթացները, որոնք հնարաւորութիւն են ընձեռում տարբեր թեմերից ժամանած հոգեւորականներին համախմբւելու Մայր Աթոռում, իրենց ուխտը վերանորոգելու, հոգեւոր փորձառութեամբ փոխանակւելու, ինչպէս նաեւ քննարկելու եկեղեցու եւ հասարակութեան առջեւ ծառացած արդի մարտահրաւէրները եւ դրանց յաղթահարման ուղիները:
Հայոց Հայրապետը յորդորեց եկեղեցականներին ամենայն ջանք ի գործ դնել ազգին, հայրենիքին ու եկեղեցուն այս ծանր ու դժւարին օրերին առաւել ջանասիրաբար ծառայելու համար։ Այս առնչութեամբ Նորին Սրբութիւնը պատգամեց քահանայ հայրերին յաւուր պատշաճի արձագանգել ազգային կեանքում տեղ գտնող անցանկալի երեւոյթներին՝ նպաստելով առկայ դժւարութիւնների յաղթահարմանը։
Անդրադառնալով Սփիւռքի հայորդիների Հայրենիքին բերած աջակցութեանը՝ Նորին Սրբութիւնն ի մասնաւորի Սփիւռքում ծառայող եկեղեցականներին յորդորեց իրենց համայնքների միջոցով տեղի իշխանութիւնների առջեւ բարձրաձայնել Հայաստանի եւ տեղահանւած արցախահայութեան առջեւ ծառացած մարտահրաւէրները։
Հայոց Հովւապետը կարեւոր նկատեց նաեւ հոգեւորականների գործուն մասնակցութիւնը հայորդիների կրթութեան եւ դաստիարակութեան գործում։
Հանդիպմանը վերապատրաստման դասընթացներին մասնակից հոգեւորականների անունից Ամենայն Հայոց Հայրապետին ողջունեց Արարատեան Հայրապետական թեմի Երեւանի Նոր Նորքի Սուրբ Սարգիս եկեղեցու հոգեւոր հովիւ Տ․ Նորայր աւագ քահանայ Բաղդասարեանը։ Տէր Հայրն իր երախտագիտութիւնը յայտնեց Հայոց Հովւապետին դասընթացների կազմակերպման համար՝ վստահեցնելով, որ դրանք իրենց օգտակարութիւնն են բերում քահանայ հայրերի հովւական ծառայութեանն առաւել արդիւնաւորման գործում։
Yerevan.today
