Տիգրան Աբրահամեան. «Լաւրովն անուղղակի «տեղեակ պահեց», որ ՀԱՊԿ-ում չմնալն ու ՌԴ-ի հետ յարաբերութիւնների նշաձողի իջեցումը հետեւանքներ կունենայ»

ՀՀ Աժ «Պատիւ ունեմ» խմբակցութեան պատգամաւոր Տիգրան Աբրահամեանը «Ֆէյսբուք»-եան իր էջում գրել է.

«Եւ այսպէս, ինչպէս եւ կանխատեսելի էր, ՌԴ ԱԳ նախարարն անդրադարձաւ Փաշինեանի` ՀԱՊԿ-ում գործունէութեան սառեցման վերաբերեալ յայտարարութեանը, նշելով, որ Հայաստանը պէտք է յստակ կողմնորոշւի` մնում է՞, թէ՞ հեռանում:

Իհարկէ այդ համատեքստում ՌԴ պաշտօնեան անուղղակի «տեղեակ պահեց», որ չմնալն ու, առհասարակ, ՌԴ-ի հետ յարաբերութիւնների նշաձողի իջեցումը նաեւ հետեւանքներ կունենայ:

Ենթադրաբար դա նշանակում է ՌԴ-ի` ՀՀ-ի նկատմամբ իրականացւող քաղաքականութեան վերանայումներ, ինչը նշանակում է քաղաքական, ռազմական համագործակցութիւնից մինչեւ տնտեսական:

Այնպէս չէ, որ ՀՀ իշխանութիւնն այս դիսկուրսը նոր է ծաւալում կամ դրա մէջ լրջութիւն դնում, հարցն այն է, որ ՌԴ-ն փորձում է վերջնականացնել հաշիւները` հասկանալու, թէ սա սովորական շանտաժ է՞, թէ՞ Հայաստանի նոր ընթացքը դէպի ԵՄ:

ՌԴ-ն սա անում է, որպէսզի հետագայում իր կոշտ հակազդեցութիւնը ՀՀ-ում եւ արտաքին աշխարհում ամբողջութեամբ լինի ընկալելի, իսկ թէ դրանք ի՞նչ հետեւանքներ կունենան եւ ի՞նչ ծաւալով կը լինի, կախւած է իրադարձութիւնների ընթացքից:

Ի՞նչ կանի այս իրավիճակում հայաստանեան իշխանութիւնը: Այո՛, կը գնայ ամենավատ ճանապարհով` ինչպէս նախորդ բոլոր կարեւոր որոշումներում»։