Բագրատ Սրբազանը՝ միջազգային ԶԼՄ-ների հետ ասուլիսի ժամանակ. «ՄԵՆՔ ԳԱԼԻՍ ԵՆՔ ԽԱՂԱՂՈՒԹԻՒՆ ՀԱՍՏԱՏԵԼՈՒ»

«ԱԼԻՔ» – Նախօրէին, «Տաւուշը յանուն Հայրենիքի» շարժման առաջնորդ Բագրատ արքեպիսկոպոս Գալստանեանն առցանց ասուլիս է տւել միջազգային մօտ 50 լրատւամիջոցների։

Ասուլիսը լուսաբանել են այնպիսի հեղինակաւոր լրատւականներ, ինչպիսիք են BBC-ին, Al Jazeera-ն, TASS-ը, Agence France Presse-ը, Sputnik-ը եւ այլ համաշխարհային կարեւորութիւն ունեցող գործակալութիւններ։

«Քաղաքականութիւնը, այն, ինչ որ այստեղ տեղի է ունենում, գոյութիւն չունի որպէս այդպիսին բանակցութիւնների մակարդակով։ Եւ մեր ցանկութիւնն է, ծրագիրը նաեւ, որ դրանք վերադառնան իրական բանակցային գործընթացների եւ բանակցային սեղան»,- ասուլիսի ընթացքում ասել է նա:

Բագրատ Սրբազանը նշել է, որ այսօր Հայաստանը  ոչ մի ասելիք չունի այդ յարաբերութիւնների մէջ, բացարձակ, ոչ մի փոխզիջումային տրամադրութիւն, ոչ մի նոյնիսկ փոխադարձ տարածքային ամբողջականութիւնը ճանաչելու հիմքեր։

«Հետեւաբար, բանակցութիւններ որպէս այդպիսին բացարձակ գոյութիւն չունեն, կան թելադրանքներ, պարտադրանքներ, ուժի սպառնալիք եւ սա չի կարող լինել որեւէ կերպով խաղաղութեան  հիմքը»,- ասել է Սրբազանը։

Մեր ծրագիրն է պատերազմը դադարեցնելը, հասնել իրական խաղաղութեան, որն այլեւս անխախտ կը լինի

Նա ասել է, որ 2020 թւականից սկսած պատերազմը չի կանգնել, շարունակւում է  անընդհատ. «Որքան այս իշխանութիւնը լինի, պատերազմը շարունակւելու է։

Ոմանք այն բնորոշում են որպէս սողացող պատերազմ։ Տեսնում ենք Տաւուշի դէպքերից։ Բնականաբար, մեր ցանկութիւնը պատերազմ դադարեցնելն է, խաղաղութեան իրական գործընթացի մէջ մտնելը ոչ թէ իմիտացիոն խաղաղութեան։

Մեր ծրագիրն է պատերազմը դադարեցնելը, հասնել իրական խաղաղութեան, որն այլեւս անխախտ կը լինի։

Մենք գալիս ենք խաղաղութիւն հաստատելու, վերացնելու քայքայիչ պատերազմի ամբողջ գոյութիւնը»։

Չեն լինի պարտադրումներ, միակողմանի զիջման թելադրանքներ

Բագրատ Սրբազանը յատուկ անդրադարձել է նաեւ խաղաղութեան գործընթացում ԵԱՀԿ Մինսկի խմբի ներկայացուցիչների ներկայութեանը կարեւորութեանը.

«Միջազգային երաշխաւորները, արդէն իսկ գոյութիւն ունեցող հարթակը այդ ամրադրումը կը կատարի եւ նաեւ բանակցութիւնները կընթանան աւելի թափանցիկ եւ վստահելի մակարդակի վրայ։ Չեն լինի պարտադրումներ, սպառնալիքներ, միակողմանի զիջման թելադրանքներ, այն, ինչ այսօր տեղի է ունենում։ Եւ այդ պատճառով էլ Ադրբեջանը, հաւանաբար, ցանկանում է վերացնել այդ միջնորդական կամ երաշխաւորների առաքելութիւնը, վերացնել ընդհանրապէս եւ ընթանալ այն նոյն ճանապարհով, ինչ-որ հիմա գոյութիւն ունի․ առանց բանակցությիւնների։

Նորից եմ կրկնում․ սա շատ կարեւոր հանգամանք է, որ պատրանքը, իմիտացիան, տրւած է, թէ բանակցութիւններ կան, բայց խորքում բանակցութիւններ գոյութիւն չունեն։ Եւ նաեւ աշխարհը մշակել է այդ սիստեմը, աշխարհը մշակել է այդ հնարաւորութիւնը, որ այս պարագայում ԵԱՀԿ Մինսկի խումբն է», – շեշտել է Բագրատ Սրբազանը։

Մեր նպատակն ու ծրագիրն է ունենալ կայուն, վստահելի, երկարաժամկէտ, դրական, կառուցողական յարաբերութիւններ բոլոր ուղղութիւններով

Անդրադառնալով ՀՀ գործող իշխանութիւնների վարած արտաքին քաղաքականութեանը, Սրբազանը նշել է, որ չի կարծում՝ այս կառավարութիւնը վեկտորի փոփոխութեան խնդիր ունի, այլ՝ այն, ինչ տեսնում ենք, տարերային, իրադարձային յարաբերութիւններ են։

«Մեր նպատակն ու ծրագիրն է ունենալ կայուն, վստահելի, երկարաժամկէտ, դրական, կառուցողական յարաբերութիւններ բոլոր ուղղութիւններով, բոլոր գործընկերների հետ։ Կարեւոր առանցքային դետալ կայ այստեղ՝ հայկական օրակարգով։ Բոլորը պէտք է նպաստեն Հայաստանի եւ հայ ժողովրդի շահերին»,- յստակեցրել է Բագրատ Սրբազանը:

Հայ-ռուսական յարաբերութիւնները լաւ վիճակում չեն

Ասուլիսի ընթացքում, Բագրատ Սրբազանն անդրադարձել է նաեւ հայ-ռուսակն յարաբերութիւններին՝ նշելով, որ Հայաստանի Հանրապետութիւնն այսօր իրաւապայմանագրային յարաբերութիւններ ունի Ռուսաստանի Դաշնութեան հետ եւ այդ յարաբերութիւնները սահմանւած են, թէպէտ այսօր, մեղմ ասած, լաւ վիճակում չեն գտնւում, եթէ չասենք՝ ամբողջութեամբ կամ մեծ մասամբ աւիրւած են։

«Հետեւաբար մեր մտածումներն են եւ ծրագիրն է, որ թէպէտ բազմաթիւ հարցեր ունենալով ռուսական կողմին, այդ բոլոր յարաբերութիւնները կարողանալ բերել համապատասխան իրաւապայմանագրային կարգաւորումների մակարդակին, եւ այդ բոլոր հարցերով հանդերձ տեղափոխել բնականոն հուն, որոնք չափազանց մեծ եւ խորը երկխօսութեան եւ փոխադարձ հասկացողութեան, կառուցողական իմաստով նորմալացման կարիք ունեն»,- նշել է նա։

Ըստ նրա՝ Հայաստանն այս փուլում, այդ յարաբերութիւնների, կարելի է ասել, չգոյութեան պայմաններում է գտնւում։

Շարժման օրակարգի առանցքը հայկական օրակարգն է, Հայաստանի Հանրապետութեան շահն է

Խօսելով ՀԱՊԿ-ի հետ Հայաստանի յարաբերութիւնների մասին՝ Սրբազանը նշել է, որ շարժման օրակարգի առանցքը հայկական օրակարգն է, Հայաստանի Հանրապետութեան շահն է։

«Եւ բոլոր յարաբերութիւնները անխտիր պէտք է այդ առանցքի շուրջ կառուցւեն»,- ասել է նա։

«Այս պահին մեր ամբողջական մտածումն այն է, որ մենք այն բոլոր սահմանւած պայմանները, որոնք կան, սահմանւած են իրաւական դաշտում, ինչպէս ասացի, իրաւապայմանագրային դաշտում, անդրադարձ պէտք է ունենանք։ Եւ այդ հարցերի շարքում է նաեւ Ձեր նշած թեման։ Եւ այդ հարցերի շարքից եւ ծիրից դուրս չի կարող գալ, որովհետեւ սրանք խորը եւ լայնաշերտ քննարկումների տեղիք պիտի տան, երկխօսութիւնների տեղիք, եւ միեւնոյն ժամանակ բարձրացւում են հարցեր, եւ բոլորը պէտք է տեղի ունենայ կառուցողական մակարդակի վրայ։ Վերստին եմ կրկնում՝ փոխադարձ հասկացողութեամբ՝ առանցք ունենալով հայական օրակարգ եւ Հայաստանի Հանրապետութեան շահը»,- յաւելել է Սրբազանը։