Արցախի թեմի առաջնորդ. «Արցախը համայն հայութեան, կրօնական տերմինով ասած՝ խաչն է»

Արցախի թեմի առաջնորդ Տէր Վրթանէս եպիսկոպոս Աբրահամեանը սեպտեմբերի 2-ին նախ կայցելի Եռաբլուր՝ իր խոնարհումը բերելու հայրենիքի նահատակւած տղաների յիշատակին, այնուհետեւ կը գնայ Արցախի ներկայացուցչութիւն՝ խօսելու ու շփւելու այն հայերի հետ, ովքեր այդ օրը կը գնան այնտեղ։

«Մենք այս պահին Արցախի անկախութեան օրւան նւիրւած միջոցառում ենք անցկացնում Արցախի թեմում, իսկ արդէն սեպտեմբերի 2-ին կը գնանք Արցախի ներկայացուցչութիւն։

Արցախի անկախութիւնը եղել է ու մեզ համար կը մնայ՝ որպէս սրբազան առաքելութեան ջանքերի շնորհիւ ձեռք բերւած մի գաղափար։ 1980-ականներից սկսած մեր զաւակներն այդ գաղափարի համար պայքարեցին ու անկախացան՝ կառուցելով պետականութիւն։

Արցախի անկախութիւնը մեզ համար հոգեւոր գանձ է, որի շուրջ մենք պէտք է շարունակենք մտածել, թէ ինչպէս կը կարողանանք կրկին այն վերարժեւորել, ողջ հայութիւնը պէտք է համախմբւի հէնց այդ գաղափարի շուրջ։ Այսօր պէտք է նաեւ, որ Հայաստանի պետականութիւնը նախ պաշտպանւի»,-168.am-ի հետ զրոյցում նշել է Սրբազանը եւ շարունակելով միտքը՝ նկատել է.

«Եթէ Արցախի պետականութիւնն այսօր կորցնենք, կամ այն լուծարւի, թէեւ որեւէ մէկն իրաւական ու բարոյական իրաւունք չունի գնալու այդ քայլին, քանի որ Արցախն անկախացել է ժողովրդի քւէով, ու ժողովուրդը կարող է իր ստեղծած պետականութեան ճակատագիրն ինքը որոշել։ Արցախը համայն հայութեան, կրօնական տերմինով ասած՝ խաչն է»։

Տ. Վրթանէս եպիսկոպոս Աբրահամեանի բնորոշմամբ՝ այն մարդիկ, որոնք Արցախը համարում են «գլխացաւանք» ու «բեռ», այդ մարդկանց համար Արցախը եւ նրա խաչը յիմարութիւններ են։ Իսկ նրանք, որոնք Արցախը համարում են զօրութիւն, նրանք Արցախն ազատագրողներն են՝ պայքարողներն ու վերակառուցողները։

«Հիմա իւրաքանչիւրս մեզ համար որոշում ենք՝ Արցախը զօրութի՞ւն է, փրկութի՞ւն, թէ՞ «գլխացաւանք»։ Մենք՝ որպէս ժողովուրդ, պէտք է կանգնենք, վերագտնենք մեր խաչը եւ դրա միջոցով՝ մեր ազգային ներուժը։ Միայն դրանով կարող ենք դառնալ վկան այն մեծ տեսիլքին, որ ազգովի պէտք է վերադառնանք դէպի խաչին՝ տիրոջ զորակցութեամբ։ Կրկնում եմ՝ սեպտեմբերի 2-ը մեզ համար շատ կարեւոր է, ազգովի պէտք է նշենք Արցախի անկախութեան օրը»,-եզրափակել է Արցախի թեմի առաջնորդը։