Արցախը՝ զոյգ աթոռների ուշադրութեան կենտրոնում

Տեղի է ունեցել Ն.Ս.Օ.Տ.Տ. Արամ Ա Վեհափառ Հայրապետի նախաձեռնութեամբ մասնագիտական քննարկումների երրորդ առցանց նիստը։ Այս մասին նշւած է Կաթողիկոսի «Ֆէյսբուք»-եան էջում։

Ինչպէս նշւած է հաղորդագրութիւնում, Հայաստանից, Արցախից եւ Սփիւռքից պատմագէտների, իրաւագէտների եւ քաղաքագէների խումբը երրորդ նիստով քննարկել է Արցախի հարցի ուղղութեամբ աշխարհաքաղաքական շատ արագ ընթացող իրադարձութիւնների հաւանական հետեւանքները։

«Առնչւած թեմաներ էին Արցախի նախագահի կատարած վերջին յայտարարութիւնները, «Զանգեզուրի միջանցք»-ի ծրագրի մասին յայտարարութիւններով ակնարկող փոփոխութիւնները, Հայաստան-Ադրբեջան խաղաղութեան պայմանագրի վերաբերեալ համաձայնւած սկզբունքները, գաղափարախօսութեան ու քաղաքականութեան համատեղումն ու տարանջատումը եւ այս բոլորի առումով Սփիւռքի դերակատարութիւնը։

Վեհափառ Հայրապետը հաստատել է, որ այս բոլորի լոյսի տակ անհրաժեշտ է համահայկական օրակարգի մշակումը եւ Հայաստան-Արցախ-Սփիւռք այսօր չգործող եռամիասնութեան յենասիւների միջեւ համակարգման ստեղծման համար նոր ռազմավարութեան մշակումը։

Առաջիկայ առցանց նիստը, որ տեղի պիտի ունենայ կիրակի, նոյեմբերի 5-ի երեկոյեան, իբրեւ օրակարգի կէտեր նկատի պիտի ունենալ Վեհափառ Հայրապետին յիշեալ ընդգծումները։

Նորին Ս. Օծութիւնը հաստատել է մասնագիտական այս հարթակի հանդիպումները հերթականօրէն գումարելու անհրաժեշտութիւնը՝ յայտնելով, որ առաջիկայ ամսում կը նախատեսւի Անթիլիասի Մայրավանքում գումարել այս ձեւաչափով առկայ երկօրեայ նիստեր։

Յիշենք, որ մասնագիտական հարթակի մասնակիցներն են պրոֆ. Աշոտ Մելքոնեանը, պրոֆ. Ռուբէն Սաֆրաստեանը, դոկտ. Արմէն Մարուքեանը, պրոֆ. Վահրամ Բալայեանը, դոկտ. Վիգէն Չթըրեանը, Խաչիկ Տէր Ղուկասեանը, դոկտ. Սիմոն Փայասլեանը, դոկտ. Վահրամ Շամմասեանը, դոկտ. Նորա Պայրագտարեանը, Շահան Գանտահարեանը եւ քարտուղար Ահարոն Շխրտըմեանը»,- նշւած է հաղորդագրութիւնում։

. . . . . . . . . . . . . . . . . . . . . . . . . . . . . . . .

Հոկտեմբերի 31-ին Մայր Աթոռ Սուրբ Էջմիածնում, նախագահութեամբ Ն.Ս.Օ.Տ.Տ. Գարեգին Բ Ամենայն Հայոց կաթողիկոսի, սկսւեց Գերագոյն հոգեւոր խորհրդի ժողովն ընդլայնւած կազմով:

Ժողովը բացւեց Տէրունական աղօթքով։ Այնուհետեւ Գերագոյն հոգեւոր խորհրդի հոգեւորական եւ աշխարհական անդամներին իր օրհնութիւնն ու բարեմաղթանքները բերեց Ամենայն Հայոց կաթողիկոսը՝ հայցելով Սուրբ Հոգու առաջնորդութիւնը ժողովի բարեյաջող եւ արդիւնաւէտ ընթացքի համար։

Քառօրեայ ժողովի ընթացքում կը քննարկւեն Հանրապետութեան առջեւ ծառացած յետպատերազմեայ մարտահրաւէրներին եւ Արցախից բռնի տեղահանւած հայորդիների հիմնախնդիրներին, Արցախի հոգեւոր-մշակութային ժառանգութեան պահպանմանը, Եկեղեցու հոգեւոր, կրթական ու սոցիալական առաքելութեանն առնչւած հարցեր:

Մայր Աթոռ Ս. Էջմիածին, Տեղեկատւական համակարգ