ՏԱՐԱԳԻՐ ՉԴԱՌՆԱՆՔ ՄԵՐ ԵՐԿՐԻՑ, ԱՊՐԵՆՔ ՈՒ ԱՐԱՐԵՆՔ ՄԵՐ ՀԱՐԱԶԱՏ ԲՆՕՐՐԱՆՈՒՄ

Ն.Ս.Օ.Տ.Տ. Գարեգին Բ Ամենայն Հայոց կաթողիկոսի պատգամը մեր Տէր Յիսուս Քրիստոսի Սուրբ Ծննդեան եւ Աստւածայայտնութեան տօնի առիթով.

«Յանուն Հօր եւ Որդւոյ եւ Հոգւոյն Սրբոյ. ամէն։
«Եկիր ի փրկութիւն ազգի մարդկան,
Թագաւոր փառաց, Քո անճառ խոնարհութեամբդ»
(Շարական):

Սիրելի բարեպաշտ ժողովուրդ,

Մեր Տէր Յիսուս Քրիստոսի Սուրբ Ծննդեան եւ Աստւածայայտնութեան լուսաշող տօնին, համախմբւած մեր սուրբ եկեղեցիների կամարների ներքոյ, փառաբանում ենք Բարձրեալ Աստծուն, որ մարդկութեան հանդէպ անհուն սիրով ու ողորմութեամբ ուղարկեց Իր Միածին Որդուն՝ ազատելու մարդ արարածին մեղքից ու մահւան կապանքներից։ «Փառքի Թագաւոր, Քո անճառ խոնարհութեամբդ եկար մարդկութեան փրկութեան համար» – օրհներգում է շարականագիրը:

Այսօր Սուրբ Ծննդեան հրաշազարդ իրադարձութիւնն է վերստին յառնում մեր հայացքի առջեւ։ Երկնային բարձունքներում գահին բազմող Փառքի Թագաւորը ծնւում է աղքատիկ մսուրում։ Փրկչի Ծննդեան հրեշտակաձայն աւետիսին ունկնդիր՝ պարզասիրտ հովիւները խոնարհւում են Մանուկ Աստւածորդու առջեւ։ Իմաստուն մոգերը երկրպագում են Փրկչին, Ով աստւածային խնամքով մարդկութեանը առաջնորդում է դէպի բարիք, հաճութիւն ու համերաշխութիւն։

Աստւածորդու հրաշափառ Սուրբ Ծնունդը անճառելի խորհուրդ է՝ մտքին անհասանելի, բայց հաւատքով ճանաչելի եւ ընկալելի։ Փրկիչը խոնարհւեց եւ մարմին առաւ նիւթականից դէպի հոգեւորն ու աստւածայինը բարձրացնելու մարդկային սրտերն ու մտքերը։ Անմահը մահկանացու դարձաւ՝ ճշմարիտ կեանքի եւ յաւիտենութեան ճանապարհը ցոյց տալու մարդկութեանը՝ համաձայն Իր խօսքի. «Ես եմ Ճանապարհը եւ Ճշմարտութիւնը եւ Կեանքը» (Յովհ. 14.6)։ Այսօր էլ բեթղեհէմեան պայծառափայլ աստղը փորձութիւններով խռովայոյզ աշխարհում փրկութեան յոյսի ճանապարհն է ուղենշում։ Սուրբ Ծննդեան գիշերը վկայում է, որ անգամ նեղութիւնների խաւարում փայլատակում է Աստծոյ լոյսը, ծագում է Արդարութեան Արեգակը, ինչպէս անւանւում է Քրիստոս շարականներում եւ մարգարէութեան մէջ (Մաղաք. 4.2)։

Քրիստոսին ընդառաջ գնալը, Նրա պատւիրաններով ապրելը վեհացնում եւ զօրացնում է անձերին ու ժողովուրդներին, արժանի դարձնում աստւածային պարգեւների եւ օրհնութիւնների։ Խանձարուրով պարուրւած Աստւածորդուն ընդունելով մարդը զգեստաւորւում է փրկութեան շնորհով, որը հաւատացեալի կեանքում բխեցնում է երկնառաք բարիքների աղբիւրը։ Աստւածամերժ ընթացքները, սակայն, մարդկութեանը կանգնեցնում են չարիքների եւ կործանարար սպառնալիքների առջեւ։

Այսօր ամենքս ականատես ենք Աստծուց հեռացող աշխարհի դառնագին իրականութեանը՝ նիւթականի պաշտամունք, քաղաքական ու տնտեսական շահեր,  տիրապետելու մոլուցք, որոնց զոհաբերւում են անհատի եւ ժողովուրդների իրաւունքները, բարոյականութեան սկզբունքները, համամարդկային խաղաղ համակեցութիւնը, երջանկութիւնն ու բարիքը։ Այս արհաւիրքների հետեւանքով մարդկութիւնը յայտնւել է աղետալի իրողութիւնների առջեւ՝ պատերազմներ, զոհեր ու աւերածութիւններ, կարիքի ու դժւարութիւնների մէջ հասակ առնող որբացեալ եւ անօթեւան երեխաներ, հակամարտութիւնների դաժան պայմաններում գոյատեւող, գաղթական դարձած ընտանիքներ։ Այսպիսի տագնապալի իրավիճակները հրամայական են դարձնում աշխարհի բարեփոխումն ու ժողովուրդների համերաշխ գոյակցութիւնը, որը մշտապէս պատգամւում է Մանուկ Աստւածորդու Սուրբ Ծննդեան՝ «յերկիր խաղաղութիւն եւ ի մարդիկ հաճութիւն» (Ղուկ. 2.14) հրեշտակաձայն օրհներգութեամբ։

Սիրելիներ, աշխարհաքաղաքական ներկայ բարդ իրադրութեան մէջ ծանր փորձութիւնների ենթարկւեց մեր ժողովուրդը՝ բռնազաւթւեց եւ հայաթափւեց Արցախը, գրաււած են մնում Հայաստանի ինքնիշխան տարածքներ, տակաւին գերութեան մէջ են եւ անյայտ կորած մեր բազում զաւակներ, Ադրբեջանի կողմից շարունակում են հնչեցւել նորանոր պահանջներ ու սպառնալիքներ։ Այսօր մեր երկիրը խռովայոյզ է ներքին խնդիրներով՝ կեղծիք, անօրինականութիւն, չարակամութիւն, քինախնդրութիւն, արատաւոր երեւոյթներ, որոնք հասարակութեան մէջ պատճառ են դառնում անվստահութեան, անտարբերութեան, թշնամանքի ու պառակտումի եւ հանգեցնում ազգի տկարացման։ Այս ամենին զուգընթաց քրիստոնէական բարոյական ընկալումների եւ ազգային-հոգեւոր աւանդական արժէքների խեղաթիւրումը աղճատում է մեր ժողովրդի ինքնութեան դիմագիծը, թուլացնում ազգային ոգին, ներքաշում դէպի մեղքի, յուսահատութեան որոգայթներ։

Սուրբ Ծննդեան խորհրդով մեզ վերստին երկնային հրաւէրն է ուղղւում՝ ընթանալու սիրոյ, հաշտութեան, արդարութեան տէրունաւանդ ճանապարհով։ Այս կոչը իրագործելի է միայն քրիստոնէական կենսակերպով։ Այս կոչը իրագործելի է, եթէ անձնական բարեկեցութեանն ու յարմարաւէտութեանը չզոհաբերենք մեր ինքնութիւնը, ժողովրդի անվտանգութիւնն ու հայրենիքի բարօրութիւնը։ Չենք կարող ծառայել համընդհանուր բարիքին՝ տրւելով փառասիրութեանն ու իշխանատենչութեանը եւ առաջնայնութիւն տալով սեփական շահերին։ Մենք՝ որպէս ազգ, լինի հայրենիքում, թէ սփիւռքում, կը յաջողենք, եթէ միշտ հաւատարիմ մնանք Քրիստոսին, Նրա վարդապետութեանը, ընթանանք Աստծոյ Խօսքի եւ աստւածային կամքի համաձայն, ձերբազատւենք մոլորեցնող ու բաժանարար մարդկային նենգամտութիւնից։ Միաբանւենք յանուն մեր պետութեան անսասանութեան եւ անվտանգութեան, Արցախից բռնի տեղահանւած մեր քոյրերի ու եղբայրների նկատմամբ արդարութեան վերականգնման, յանուն մեր ազգի ու հայրենիքի ապահով եւ բարօր հարատեւութեան։ Լինենք միմեանց գործակից եւ ոչ՝ հակառակորդ, լինենք նախանձախնդիր ծառայելու եւ ոչ՝ դիրքն ու հանգամանքը չարաշահելու մէջ։ Տարագիր չդառնանք մեր երկրից, ապրենք ու արարենք մեր հարազատ բնօրրանում։ Երեխաների նոր ծնունդով, արժանաւոր զաւակների դաստիարակութեամբ հզորացնենք մեր ազգն ու հայրենիքը։ Իւրաքանչիւրս մեր կարողութեան չափով ներդրում բերենք համազգային կեանքի առաջընթացին՝ ի պայծառութիւն մեր պետութեան եւ ի շահ մեր ժողովրդի լուսաւոր գալիքի։

Սուրբ Ծննդեան ուրախալի աւետիսով ողջունում ենք Առաքելական մեր Սուրբ Եկեղեցու Նւիրապետական Աթոռների Գահակալներին՝ Ն.Ս.Օ.Տ.Տ. Արամ Ա Մեծի Տանն Կիլիկիոյ կաթողիկոսին, Երուսաղէմի Հայոց Պատրիարք ամենապատիւ Տ. Նուրհան արքեպիսկոպոս Մանուկեանին, Կոստանդնուպոլսի Հայոց Պատրիարք ամենապատիւ Տ. Սահակ արքեպիսկոպոս Մաշալեանին, մեր Սուրբ Եկեղեցու ուխտապահ ողջ հոգեւոր դասին: Մեր ողջոյնն ենք յղում ի Քրիստոս Մեր հոգեւոր եղբայրներին՝ քոյր Եկեղեցիների Պետերին եւ հաւատաւոր իրենց հօտին: Հայրապետական Մեր սէրն ու օրհնութիւնն ենք բերում համայն մեր ժողովրդին ի հայրենիս եւ ի սփիւռս աշխարհի:

Սուրբ Ծննդեան հոգենորոգ այս օրը միասնաբար աղօթք մատուցենք մարդեղացեալ Աստւածորդուն եւ հայցենք, որ առատ լինեն երկնայեղ օրհնութիւնները ազգային ու հայրենական մեր անդաստանում, հաստատուն մնան տէրունաւանդ հաւատքը, յոյսն ու սէրը մեր կեանքում։

Խնդրենք Երկնաւոր Տիրոջ զօրակցութիւնը մեծ կորուստներ կրած եւ հարազատ բնօրրանից զրկւած արցախահայութեանը։ Խնդրենք Ամենակալից, որ խաղաղութիւն ու բարօրութիւն հաստատւի ողջ աշխարհում եւ հայրենի մեր երկրում։ Թող Աստծոյ ամենախնամ Աջը եւ Սուրբ Ծննդեան կենարար շնորհները մշտապէս հովանի լինեն համայն մեր ժողովրդին այսօր եւ միշտ եւ յաւիտեանս. ամէն։

Քրիստոս ծնաւ եւ յայտնեցաւ,

Ձեզ եւ Մեզ մեծ Աւետիս»։