«5-րդ շարասեան» մասին լրտեսութեան յօդւածով ընդամէնը մէկ քրէական գործ է յարուցւել

Պաշտպանութեան նախարար Սուրէն Պապիկեանը ԱԺ ամբիոնից հրապարակային խոստացաւ դեկտեմբերի 24-ին ինձ անակնկալ մատուցել։ Չգիտեմ ինչ էր պատրաստւում անել հէնց այդ օրը, սակայն դեկտեմբերի 22-ին ՊՆ-ից ստացած հարցմանս պատասխանը պակաս զարմացական չէ:

Դեռ դեկտեմբերի 4-ին նրան ուղղւած գրաւոր հարցում էի ուղարկել, որ պարզեմ, թէ 2023 թւականի նոյեմբերի 24-ի մամուլի ասուլիսում Փաշինեանի յայտարարութիւնը, որ «այսօր բանակում ազատւել ենք 5-րդ շարասիւնից», ինչպէս է արտայայտւել ՀՀ Զինւած ուժերում։ Պապիկեանին ուղղել էի ընդհանուր վեց հարց։ Դրանց պատասխանելու համար օրէնքով նախատեսւած 5 օրւայ փոխարէն Պապիկեանից պահանջւել է քսան օր, իսկ արդիւնքում ստացել եմ մէկ նախադասութեամբ պատասխան՝ «ՀՀ Պաշտպանութեան նախարարութիւնն այլ պարզաբանումներ, քան տրւել է ՀՀ վարչապետի կողմից՝ չունի»: Քսան օր լռել, որ վերջում յայտարարել, թէ շէֆն ամէն դէպքում ճիշտ է, առաւել քան տարօրինակ է։

Ուշագրաւ է, որ գլխաւոր դատախազութիւնը նոյն «5-րդ շարասեան» մասին հարցմանս, թէ Նիկոլ Փաշինեանի բացատրած այլ պետութիւնների շահերին ծառայելու, ասել է թէ՝ լրտեսութեան յօդւածով քանի քրէական գործ է յարուցւել 2021-2023 թւականներին, աւելի յստակ էր պատասխանել՝ ընդամէնը մէկ քրէական գործ է յարուցւել։ Ընդամէնը ՄԷԿ քրէական գործ։

Պաշտպանութեան նախարարութիւնը դժւարին կացութեան մէջ է՝ փաշինեանական անպատասխանատու յայտարարութեանը ստիպւած էր կոնկրետ, փաստերով, ձեւակերպումներով պատասխան տալ, որը բնականաբար չի կարողացել։ Սակայն խօսք կայ՝ խօսքը տղամարդու շուրթերից է ելնում։ Հետեւաբար, անպատասխանատու խօսքի համար նաեւ պատասխան են տալիս։ Ամէն դէպքում այսօր (դեկտեմբերի 25-ԽՄԲ.) կրկնակի հարցում եմ ուղարկելու Պապիկեանին ու ակնկալելու եմ ստանալ բոլոր 6 հարցի թւագրւած, կոնկրետ պատասխաններ, ինչպէս եւ պահանջում է ՀՀ օրէնսդրութիւնը:

Կողմնորոշւէք, պարոնա՛յք, քանի որ փաշինեանական անպատասխանատու յայտարարութիւններով մեր երկրի ազգային անվտանգութիւնը, Զինւած ուժերն են, որ վտանգի տակ են յայտնւում, հեղինակազրկւում։

Գեղամ Մանուկեան

ՀՅԴ Հայաստանի ԳՄ անդամ, ԱԺ «Հայաստան» խմբակցութեան պատգամաւոր