Իրանի Իսլ. խորհրդարանում կրօնական փոքրամասնութիւնների պատգամաւորները դատապարտել են Իրանի հիւպատոսութեան դէմ սիոնիստական վարչակարգի յարձակումը
«ԱԼԻՔ» -Սիրիայում Իրանի հիւպատոսութեան շէնքի վրայ սիոնիստական վարչակարգի յարձակումը դատապարտելու առումով, Իրանի Իսլամական խորհրդարանում կրօնական փոքրամասնութիւնների պատգամաւորները դատապարտանքի համատեղ յայտարարութեամբ են հանդէս եկել:
Յայտարարութեան մէջ, որը օրաթերթիս է տրամադրւել Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանի գրասենեակից նշւած է. «Պաղեստինի ժողովրդի եւ Դիմադրութեան ճակատի իրաւացի եւ ազատատենչ պայքարի պատմութեան մէջ, ընդմիշտ յիշւելու է Պաղեստինի եւ Գազայի ժողովրդի տառապանքն, անձնազոհութիւնը, խիզախութիւնները եւ տեղի ունեցած իրադարձութիւնները: Այս իրաւատենչ պայքարին անխախտ ձեւով ուղեկցում է Իրանի ժողովուրդը»: Յայտարարութեան մէջ նշւած է, որ սիոնիստական անբարոյ վարչակարգը եւ նրան հովանաւորողները իրենց ոճրագործութիւնների պատճառով ի վերջոյ արժանանալու են հազարաւոր կանանց, տղամարդկանց ու երեխաների անեծքին:
Յայտարարութիւնը այսպէս է շարունակւում. «Հարւած ստացած Իսրայէլը իր ոճրագործութիւնները շարունակելով, եւ իր սանձերը արձակած, գազանաբարոյ եւ բարդոյթաւորւած յարձակւել է մեր սիրելի Իրանի հիւպատոսարանի վրայ: Նման գազանային ակտերը, որը համարւում են լուրջ ոտնձգութիւն մի վաղեմի երկրի ինքնիշխանութեան նկատմամբ, խստագոյնս դատապարտելի է եւ անպատիժ չի մնալու: Մենք, Իրանի Իսլամական խորհրդարանում կրօնական փոքրամասնութիւնների պատգամաւորներս եւ մեր համայնքների բոլոր անդամները, դատապարտում ենք սիոնիստների այս ոճրագործութիւնը եւ վստահ ենք, որ անպատիժ չի մնալու գեներալների, հրամանատարների եւ նրանց զինակիցների տմարդի սպանութիւնը: Երկրի եւ Դիմադրութեան ճակատի բոլոր սիրելիների նահատակութեան կապակցութեամբ, վշտակցութիւն յայտնելով Իսլամական յեղափոխութեան առաջնորդին, Իրանի եւ Սիրիայի ժողովուրդներին եւ նահատակների հարազատներին, չենք կասկածում, որ իրանցիների վճռակամութիւնը, եւ համախոհութիւնը ինչպէս միշտ վեհութիւն է ընծայելու»:
Յայտարարութիւնը ստորագրել են՝ Իրանի հրեաների պատգամաւոր Հոմայուն Սամեհ Եահը, Սպահանի եւ հարաւային իրանահայութեան պատգամաւոր Ռոբերտ Բեգլարեանը, Իրանի Զրադաշտների պատգամաւոր Էսֆանդիար Էխթիարին, Իրանի ասորիների եւ քաղդէականների պատգամաւոր Շառլի Էնւիէ Թեքիէն եւ Թեհրանի եւ հիւսիսային իրանահայութեան պատգամաւոր Արա Շահվերդեանը:
