Ատոմական էներգիայի միջազգային կազմակերպութիւնը հաւատարիմ մնայ անկողմնակալութեան սկզբունքին
«ԱԼԻՔ» – Ատոմական էներգիայի միջազգային կազմակերպութեան ՄԱԳԱՏԷ-ի գլխաւոր տնօրէնի կողմից, կազմակերպութեան Կառավարիչների խորհրդին ուղղւած զեկոյցներին առ ի պատասխան, Իրանի բացատրական գրութիւնը հրապարակւել է Վիեննայում տեղակայւած միջազգային կազմակերպութիւններում եւ ՄԱԿ-ի գրասենեակում:
ԻՌՆԱ-ի հաւաստմամբ՝ Իրանի բացատրական գրութեան մէջ նշւած է. «Դժբախտաբար, ՄԱԳԱՏԷ-ի գնահատականները հիմնւած են ոչ հաւաստի տեղեկութիւնների, եւ ոչ հաւաստի փաստաթղթերի վրայ, որոնք տրամադրւել են այնպիսի ռեժիմի կողմից, որը միշտ դաւեր է նիւթում ՄԱԳԱՏԷ-ի հետ Իրանի յարաբերութիւնների դէմ:
Իրանը, երբ որոշում ընդունեց դադարեցնել Միջուկային գործարքի համապարփակ ծրագրում իր պարտաւորութիւնների իրականացումը, դա կատարելապէս համահունչ էր երկրի բնածին իրաւունքներին, եւ պատասխան քայլ էր այդ համաձայնագրից ԱՄՆ-ի անօրինական հեռացման եւ եւրոպական երեք երկրների կողմից իրենց պարտաւորութիւններին հաւատարիմ մնալու անկարողութեան: Այս բացայայտ իրականութիւնը չի կարող հիմք հանդիսանալ եւրոպական երեք երկրների համար հրաժարւելու իրենց պարտաւորութիւններից:
Թէեւ Իրանի Իսլամական Հանրապետութիւնը երկու անգամ (2014 թ. հոկտեմբերի 15-ին եւ 2015 թ. փետրւարին) ընդունել է կազմակերպութեան կողմից առաջարկւած 14 նոր տեսուչների նշանակումը, ցաւօք, այդ հարցը պատշաճ կերպով չի արտացոլւել զեկոյցում։
Իրանի հրապարակած գրութեան մէջ նաեւ նշւած է, որ Իրանը Ատոմական էներգիայի միջազգային կազմակերպութեան հետ առաւել համագործակցութեան շրջագծում, վերջին տարիներին կամաւոր քայլեր է ձեռնարկել մի քանի համատեղ յայտարարութիւնների շրջանակում, ինչպէս 2023 թւականի մարտի 4-ի համատեղ յայտարարութիւնը:
Մէկ այլ կէտի մէջ նշւած է, որ Իրանի Իսլամական Հանրապետութիւնը կրկին շեշտում է կազմակերպութեանը տրամադրւող համագործակցութեան կարեւորութիւնն ու արժէքը: Այս կառուցողական համագործակցութիւնը չպէտք է նսեմանայ անհեռատես քաղաքական շահերի պատճառով: Ուստի, կազմակերպութիւնը պարտաւոր է վերահասութիւն տալ նման հարցերի, կանխելու՝ Իրանի ու կազմակերպութեան միջեւ լայնածաւալ համագործակցութեան խեղաթիւրումը:
