Խաչվերացի տօնը Մայր Աթոռ Սուրբ Էջմիածնում
Սեպտեմբերի 13-ին Հայաստանեայց Առաքելական Սուրբ Եկեղեցին հանդիսաւորութեամբ նշեց հինգ տաղաւար տօներից վերջինը՝ Խաչվերացի տօնը: Նւիրական օրւայ առիթով Միածնաէջ Մայր Տաճարում, հանդիսապետութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, մատուցւեց Սուրբ եւ Անմահ Պատարագ: Պատարագիչն էր Շիրակի թեմի առաջնորդ Գերաշնորհ Տ. Միքայէլ արք. Աջապահեանը։
Սրբազան Հայրն, անդրադառնալով օրւայ խորհրդին, նշեց, որ Խաչվերացը տխրութեան, սգի, տրտմութեան ու չարչարանքի գիտակցութեան օր չէ, այլ խաչի յաղթութեան ու բարձրացման:
Խօսելով Խաչվերացի տօնի պատմական իրադարձութիւնների մասին՝ Միքայէլ արքեպիսկոպոսն ընդգծեց, որ ինչպէս մեր եկեղեցական ցանկացած տօն, Խաչվերացը եւս ասելիք ունի այսօրւայ մարդուն։ Այն մեզ համար սոսկ պատմական իրադարձութիւն չէ, այլ այսօր տեղի ունեցող կենդանի իրողութիւն, որը միտւած է փոխակերպելու մեզ, որպէսզի մենք նմանւենք մեր երկնաւոր Հօրը։
«Խաչվերացը պատգամ ունի՝ փարւելու խաչին ու Խաչեալի խորհրդին եւ դրանով վաստակելու յարութիւն ոչ միայն անհատական, այլեւ հաւաքական ու հայրենական կեանքում: Խաչը պէտք է յաղթական լինի մեր երկրի բոլոր անկիւններում, եւ երբեք թոյլ չպիտի տանք, որ խաչի նշանն անարգւի»,- յաւելեց Պատարագիչ սրբազանը։
Քարոզի վերջում, վերըստին դիմելով ներկաներին, Սրբազան Հայրը պատգամեց՝ Քրիստոսի Կենարար խաչն ունենալ սրտերում, մտքերում եւ հոգիներում՝ իբրեւ կենարար մի աղբիւր, որը կեանք է տւել դարեր շարունակ, կեանք է տալիս այսօր եւ տալու է վաղը, որովհետեւ Խաչեալին մահ չկայ, եւ խաչին փարւածին սպասւում է յարութիւն ու յաղթանակ:
