Աշխարհի գաւաթ․ Արթուր Դաւթեանը դարձեալ նւաճեց ոսկէ մեդալը
![](/wp-content/uploads/2024/02/artur-davtian-20240226-780x470.jpg)
Գերմանիայի Կոտբուս քաղաքում անցկացւող սպորտային մարմնամարզութեան աշխարհի գաւաթի խաղարկութեան երկրորդ փուլում Հայաստանի առաջատար, Տոկիոյի Օլիմպիական խաղերի բրոնզէ մեդալակիր, աշխարհի եւ Եւրոպայի չեմպիոն Արթուր Դաւթեանը նւաճեց յաղթողի կոչումը:
Յենացատկի վարժութեան եզրափակիչում Դաւթեանը հաւասարը չունեցաւ՝ վաստակելով 15,050 միաւոր:
Եգիպտոսի մայրաքաղաք Կահիրէում անցկացւած աշխարհի գաւաթի խաղարկութեան առաջին փուլում Արթուր Դաւթեանը ոսկէ մեդալակիր էր դարձել 14,933 միաւորով:
Յակոբ Սերոբեանի գլխաւորած հաւաքականից Կոտբուսում բրոնզէ մեդալակիր է դարձել Վահագն Դաւթեանը: Օղակների վարժութեան եզրափակիչում Դաւթեանը վաստակել է 14.600 միաւոր:
Աշխարհի գաւաթի խաղարկութեան փուլերը վարկանիշային են Փարիզի Օլիմպիական խաղերի համար: Հայաստանի հաւաքականի օլիմպիական ուղեգիր ունի Արթուր Դաւթեանը, որը նւաճել է 2023 թւականի աշխարհի առաջնութիւնում բազմամարտում:
Sport.news.am