Արցախի ԱԺ յայտարարութիւնը. «Կոչ ենք անում զերծ մնալ չկշռադատւած ոչ համարժէք քայլերից»
Արցախի ԱԺ-ն յայտարարութիւն է տարածել ՀՀ կառավարութեան կողմից մշակւող Արցախից բռնի տեղահանւած հայրենակիցների աջակցութեան ծրագրերի կապակցութեամբ:
«Սոյն թւականի փետրւարի 27-ին Հայաստանի հանրային հեռուստաընկերութեան եթերում ՀՀ փոխվարչապետ Տիգրան Խաչատրեանն անդրադարձել է ցեղասպանութեան եւ նրա սպառնալիքի տակ Արցախից բռնի տեղահանւած մեր հայրենակիցների համար ՀՀ կառավարութեան կողմից առաջարկւող աջակցութեան ծրագրերին։
Մեր գնահատմամբ՝ փոխվարչապետի միջոցով արցախեան հանրութեանը մատուցւող ՀՀ կառավարութեան կողմից նախատեսւող ծրագրերը համարժէք չեն տիրող իրավիճակին: Հարկ ենք համարում շեշտել, որ մինչ այժմ իրականացւած որեւէ ծրագիր չի քննարկւել Արցախի Հանրապետութեան ժողովրդի կողմից լեգիտիմ մանդատ ունեցող որեւէ կառոյցի, այդ թւում ժողովրդի ուղղակի քւէով ընտրւած Ազգային ժողովի հետ։
Իսկ զանազան միջոցներով մեր կողմից ներկայացւած առաջարկներն անտեսւել են։ Յատկապէս անընդունելի է Արցախից տեղահանւած ժողովրդի համար բնակարաններ ձեռք բերելու կապակցութեամբ դեռեւս քննարկւող ծրագիրը, որը, հարցի քաղաքական եւ սոցիալական համակողմանի քննարկման արդիւնքում, ակնյայտօրէն, չի բաւարարելու բռնի տեղահանւած մեր հայրենակիցների նւազագոյն սպասելիքներն ու ակնկալիքները։
Նման որոշումների կայացումը յանգեցնելու է մեր հայրենակիցների հիասթափութեանն ու դժգոհութեանը, որի արդիւնքում կը խթանւի արտագաղթը եւ բողոքների ալիքը, կը խաթարւի մեզ համար օրախնդիր՝ հաւաքական վերադարձի ակնկալիքը։
Կոչ ենք անում զերծ մնալ չկշռադատւած ոչ համարժէք քայլերից։ Միաժամանակ, վերահաստատում ենք փոխադարձ հետաքրքրութիւն ներկայացնող խնդրայարոյց հարցերի շուրջ կառուցողական քննարկումներ իրականացնելու մեր պատրաստակամութիւնը՝ ողջախոհ, արժանապատւութիւնը չնսեմացնող որոշումների յանգելու համար։
«Ազատ հայրենիք» խմբակցութիւն
«Միասնական հայրենիք» խմբակցութիւն
«Արդարութիւն» խմբակցութիւն
«Հ. Յ. Դաշնակցութիւն» խմբակցութիւն
«Արցախի ժողովրդավարական կուսակցութիւն» խմբակցութիւն
Երեւան 28 փետրւարի 2024 թ.»:
