«Եւրոպացիները յանուն Արցախի» նախաձեռնութիւնը նախանշում է առաջիկայ գործողութիւնների ընթացքը

«Եւրոպացիները յանուն Արցախի» նախաձեռնութեան շրջանակներում Բելգիայի, Ֆրանսիայի, Գերմանիայի, Շւեդիայի, Բուլղարիայի, Յունաստանի, Կիպրոսի եւ Մեծ Բրիտանիայի հայ համայնքների ղեկավարները սեպտեմբերի 15-ին առցանց հանդիպում են անցկացրել՝ քննարկելու նախաձեռնութեան առաջիկայ անելիքները։

Մասնակիցները վերահաստատել են արցախահայութեանն ու վերջինս ինքնորոշման հիմնարար իրաւունքին իրենց հաստատուն աջակցութիւնը, որպէս գոյաբանական անհրաժեշտութիւն՝ Ադրբեջանի էթնիկ զտումների շարունակական քաղաքականութեան պայմաններում։ Շեշտւել է` ինքնորոշման իրաւունքն արցախահայութեան պարագայում հաւասարազօր է սեփական հայրենիքում կեանքի, անվտանգութեան եւ արժանապատւութեան անքակտելի իրաւունքին:

Հանդիպման ընթացքում քննարկւել են մի քանի հիմնական ծրագրեր։ Գլխաւոր թեման հոկտեմբերի 1-ին Բրիւսէլում կայանալիք համաեւրոպական բողոքի ցոյցն է, որի նպատակն է Եւրոպայում բարձրացնել Ադրբեջանի կողմից արցախահայութեան նկատմամբ կիրառւող ապօրինի ամբողջական շրջափակման վերաբերեալ իրազեկութիւնը եւ Եւրոպական միութեան, ինչպէս նաեւ անդամ պետութիւնների գործադիր մարմիններից պահանջել արդիւնաւէտ քայլեր ձեռնարկել այդ աղէտին վերջ տալու համար:

Բողոքի համաեւրոպական ակցիան եւրոպահայերի եւ մարդու իրաւունքների ջատագովների համար կը ծառայի որպէս միասնական միջոց՝ մտահոգութիւններ արտայայտելու ԵՄ, Մեծ Բրիտանիայի իշխանութիւնների հասցէին, ինչպէս նաեւ պահանջելու՝ գործել հռչակւած հիմնարար արժէքների ոգով: Նոյն օրը բրիւսէլեան ցոյցին զուգահեռ, հայ համայնքները եւրոպական այլ երկրներում եւս կը կազմակերպեն հանրահաւաքներ վերը նշւած պահանջներով։

«Եւրոպացիները յանուն Արցախի» նախաձեռնութեան անդամները նպատակ ունեն համատեղ գործողութիւնների եւ յամառ քարոզչութեան միջոցով արցախահայութեան ձայնը լսելի դարձնել Եւրոպայում։ Որպէս եւրոպական երկրների քաղաքացիներ, ովքեր հաւատում են մարդու իրաւունքների անձեռնմխելիութեանը, այս հարթակի անդամները նաեւ ակնկալում են ԵՄ, ինչպէս նաեւ Միացեալ Թագաւորութեան ղեկավարութիւնից, որպէսզի վերջիններս օգտագործեն իրենց տրամադրութեան տակ գտնւող բոլոր արդիւնաւէտ լծակները՝ կասեցնելու Ադրբեջանի կործանարար քաղաքականութիւնը թէ՛ Հայաստանի Հանրապետութեան, թէ՛ Արցախի Հանրապետութեան նկատմամբ։ Հետագայ գործողութիւնների մասին կը տեղեկացւի յընթացս։

«Եւրոպացիները յանուն Արցախի» նախաձեռնութիւնը համաեւրոպական համագործակցային հարթակ է, որը ստեղծւել է Եւրոպայի հայ համայնքների ներկայացուցիչների կողմից։ Այն նպատակ ունի պաշտպանելու Արցախի/Լեռնային Ղարաբաղի բնիկ հայ բնակչութեան հիմնարար իրաւունքները, Եւրոպայում բարձրացնելու իրազեկւածութիւնը ադրբեջանական կործանարար քաղաքականութեան հետեւանքով արցախահայութեան առջեւ ծառացած մարտահրաւէրների վերաբերեալ եւ ներգրաւելու եւրոպական քաղաքական կառոյցներին այս մարտահրաւէրները չէզոքացնելու գործում։

Լրացուցիչ տեղեկութիւնների համար այցելէք www.europeansforartsakh.eu

 

ՀՅԴ Բիւրոյի Հայ Դատի կենտրոնական գրասենեակ
19.09.2023 թ.