Հանդիպում ազգային առաջնորդարանում

Արցախում ստեղծւած իրավիճակին հնարաւոր եղանակներով աջակցելու հարցերի քննարկման օրակարգով, չորեքշաբթի, սեպտեմբերի 20-ին, Թեհրանի հայոց թեմի առաջնորդ Տ. Սեպուհ արք. Սարգսեանի նախաձեռնութեամբ, հրատապ կարգով ազգային առաջնորդարանի դահլիճում կայացաւ խորհրդակցական հանդիպում:

Հանդիպմանը ներկայ էին Իրանի Իսլամական խորհրդարանում Սպահանի եւ հարաւային իրանահայութեան պատգամաւոր՝ Ռոբերտ Բեգլարեանը, Մեծի Տանն Կիլիկիոյ կաթողիկոսութեան ազգային կենտրոնական վարչութեան Քաղաքական ժողովի անդամ՝ Յովսէփ Աւետեանը, ՀՅԴ Բիւրոյի անդամ՝ Վիգէն Բաղումեանը, Թ. Հ. Թ. Պատգամաւորական ժողովի եւ Թեմական խորհրդի դիւանները, «Ալիք» հաստատութեան, «Ալիք» օրաթերթի եւ Թեհրանի Հայ Դատի յանձնախմբի ներկայացուցիչները նաեւ ազգային առաջնորդարանի դիւանապետը:

Հանդիպման սկզբում, Սրբազան Հայրը նախ անդրադարձաւ Արցախում տիրող ողբերգական իրադարձութիւններին եւ յայտնեց, որ մեր պատմական Հայրենիքը, Արցախը եւ ողջ հայ ժողովուրդը յայտնւել են Հայոց պատմութեան ամենածանր, ողբերգական եւ ճակատագրական ժամանակահատւածում եւ մենք թէ՛ որպէս համայնք, եւ թէ՛ որպէս ժողովուրդ չենք կարող անտարբեր մնալ այս դառն իրողութեան դիմաց եւ կոչւած ենք համատեղ կերպով մտածելու Արցախի ժողովրդին աջակցելու հնարաւոր միջոցների որոնման մասին: Ապա խօսքը փոխանցեց ՀՅԴ Բիւրոյի անդամ՝ Վիգէն Բաղումեանին, ով հանգամանօրէն բացատրութիւններ տւեց իրականացւող աշխատանքների մասին:

Հանդիպման ընթացքում հրաւիրեալները, իւրաքանչիւրն իր հերթին, անդրադարձան ստեղծւած իրավիճակին եւ հնարաւոր քայլերին: Խորհրդակցութիւնից յետոյ եւ կարծիքների փոխանակման, արդիւնքում համաձայնաբար որոշւեց նամակներ յղել երկրի Հոգեւոր Առաջնորդին եւ պատկան այլ մարմիններին ինչպէս նաեւ ՄԱԿ-ի եւ Եւրոխորհրդի ղեկավարութեանը:

Ժողովականները ընդառաջեցին նաեւ Սրբազան Հօր մտածումը՝ եկեղեցիներում Արցախի զօրակցական եռօրեայ աղօթքի եւ եկեղեցիների զանգերը ղօղանջելու վերաբերեալ: Գնահատւեց նաեւ Իրանի Իսլամական խորհրդարանում Սպահանի եւ հարաւային իրանահայութեան պատգամաւոր Ռոբերտ Բեգլարեանի ունեցած դիպուկ, հանգամանալից ու ընդգրկուն ելոյթը:

Ազգային առաջնորդարանի Հանրային կապի գրասենեակ