Կիրակի, ապրիլի 14-ին, ազգային առաջնորդարան այցելեցին «Պատանիի ինքնութեան կերտումը» խորագրով, ՀՅԴ Պատանեկան համագումարին մասնակից՝ Թեհրանի, Հայաստանի, Արցախի, Սիրիայի եւ Լիբանանի պատանեկան կառոյցների ներկայացուցիչները՝ ընկերակցութեամբ իրենց պատասխանատուների, ովքեր կիրակի առաւօտեան ս. պատարագին մասնակից լինելուց յետոյ ազգային առաջնորդարանի դահլիճում հանդիպում ունեցան Արբազան Հօր հետ:
Սրբազան Հայրը մեծապէս ողջունեց եւ իր գոհունակութիւնը յայտնեց այցելութեան առիթով: Թեմակալ առաջնորդը ամփոփ գծերով ներկայացրեց թեմի պատմական անցեալը եւ ընդհանուր բացատրութիւն փոխանցեց Թեհրանի հայոց թեմում աշխատող եկեղեցիների, դպրոցների եւ միութիւնների վերաբերեալ միաժամանակ կարեւորելով երիտասարդութեան մասնակցութիւնը եւ դերակատարութիւնը ազգային-հոգեւորական կեանքում:
Պատանիները խանդավառութեամբ եւ հետաքրքրութեամբ ունկնդրեցին Սրբազան Հօր արտայայտութիւնները, որի ընթացքում հնչեցին հարցումներ եւ ջերմ ու սրտալից խօսքեր:
Անդրադառնալով Հայրենիքի իրավիճակին Սրբազան Հայրը ցաւով արտայայտւեց, որ դժբախտաբար Եռաբլուրը ընդարձակւում իսկ մեր երկրի սահմանները փոքրանում են, հետեւաբար մեր նոր սերնդի պարտականութիւն եւ պարտաւորութիւնն է ամենայն նախանձախնդրութեամբ իրենց դերակատարութիւնն ունենան հայրենիքի պաշտպանութեան եւ ազգային ինքնութեան պահպանման համար:
Հանդիպման աւարտին Սրբազան Հօր ձեռամբ «Հայոց տաժանքի Ճամբաներով» խորագրով երկհատորանոց գիրքը նւիրւեց պատանիներին:
Ազգային առաջնորդարանի Հանրային կապի գրասենեակ
