Համբարձման տօնի նշում Ուրմիայի «Նայիրի» կրթարանում
Ատրպատական, ազգային առաջնորդարան, Թաւրիզ – Չորեքշաբթի, մայիսի 8-ի առաւօտեան, ՀՕՄ-ի Ուրմիայի մասնաճիւղի «Նայիրի» մանկապարտէզ-նախակրթարանը իր յարկի ներքոյ նշեց Համբարձման տօնը:
Սոյն Տէրունի տօնի առիթով, երեխաների կողմից պատրաստւել էին երգեր, քառեակներ եւ մի գեղեցիկ պար, որոնք ղեկավարում էին ուսուցչուհիներ Օֆելիա Սայեադեանը եւ Ռուզաննա Մուրադեանը. իսկ պարը բեմադրել էր պարուսոյց Ցօղիկ Մուրադեանը:
Համբարձման տօնի առիթով պատրաստւել էին նաեւ քառեակներ «Ջան գիւլում»-ի համար, որոնք տեղադրւել էին գեղեցիկ զամբիւղի մէջ: Դրանք բաշխւեցին ներկաներին, ովքեր ընթերցեցին իրենց բախտ ընկած քառեակը:
Ներկաները հիւրասիրւեցին թէյով, քաղցրաւենիքով, համեղ խմորեղէնով: Հաստատութեան տնօրէնուհի Ռոնիկ Մեջլումեանը յատուկ նւէրներ էր պատրաստել երեխաների համար, որոնք յատուկ հանդիսաւորութեամբ յանձնւեցին նրանց: Փոքրիկները երգեցին, պարեցին, ուրախացան եւ մեծ բաւականութիւն ստացած, չուզելով հեռացան իրենց ամենօրեայ ուսումնական կրթարանից:
