Թաւրիզի Համալսարանականների միութեան քաջալերանքը՝ նոր ուսանողներին
Ատրպատական, ազգային առաջնորդարան, Թաւրիզ – Չորեքշաբթի, 17 դեկտեմբերի 2025-ի երեկոյեան ժամը 7:30-ին, ազգային առաջնորդարանի «Համազասպ Ոսկանեան» հանդիսասրահում տեղի ունեցաւ տարեկան յատուկ ծրագիրը, որի ընթացքում քաջալերանքի յատուկ հանդիսախօսութեամբ լուսարձակի տակ են առնւում այն երիտասարդ-երիտասարդուհիները, որոնք համալսարան են յաճախում, յատուկ յաջողութիւններ են արձանագրում իրենց ուսումնական ծրագրերում, եւ կամ նրանք, որոնք նոր են արձանագրւել բարձրագոյն ուսման:
Հանդիսութեանը նախագահեց Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը: Ներկայ էին Տ. Մարտիրոս քհնյ. Ղուկասեանը, Թեմական եւ Պատգամաւորական ժողովի ներկայացուցիչները, ինչպէս նաեւ համալսարանական ուսանողների ծնողները եւ հարազատները:
Բացման խօսքով հանդէս եկաւ Միութեան վարչութեան անդամուհի Սիլւա Ասատրեանը: Նա ողջունեց բոլորին, եւ ուշադրութեան առարկայ դարձրեց հաւաքի նշանակալից առիթը, երբ իրենց սեփական աշխատանքով, թեմի հաւաքական պատիւը բարձրացնող դիրք էին ապահովել Ատրպատականի զաւակ ուսանող-ուսանողուհիները: Սիլւա Ասատրեանը ամփոփ պատմականը կատարեց միութեան հիմնադրութեան, որի կազմակերպման եւ հաստատման մէջ մեծ դեր էր ունեցել պրոֆ. դոկտ. Մկրտիչ Թումանեանը: Նոյն առիթով յատկապէս յիշւեց եւ յատուկ գնահատանքի արժանացաւ Անահիտ Յակոբեանը, որը մի քանի նստաշրջան շարունակաբար Վարչութեան ատենապետի պաշտօնն էր ստանձնել, ընդհանուր վերակարգաւորման ենթարկելով միութիւնը:
Վարչութիւնը յատուկ հրաւէր էր ուղարկել նաեւ այն անձնաւորութիւններին, որոնք վաստակաւոր անձեր են եղել ուսումնական կեանքում, եւ երկար տարիներ դասախօսել համալսարաններում: Վարչութեան անդամ Արաքս Առաքելեանի միջոցով հերթաբար բեմ հրաւիրւեցին նրանք, եւ գնահատական արձանագրութեամբ պղնձեայ մասնաւոր յուշատախտակներ ստացան, ձեռամբ Սրբազան Հօրը եւ բեմ հրաւիրւած անձերի՝ Տէր Հօր, Պատգամաւորական ժողովի ատենապետուհի Արմինէ Վահրամեանի, Թեմական խորհրդի ատենապետ Գագիկ Ջորջեանի, եւ Թաւրիզի Հայ Համալսարանականների միութեան վարչութեան ատենապետ՝ Վարդան Ենովքեանի:
Վարչութեան յատուկ գնահատանքին արժանացան նաեւ մշակոյթի նւիրեալներ, որոնք նկարչութեան արւեստի, եւ երաժշտութեան բնագաւառում յաջողութիւնների էին հասել, ու ցուցահանդէսներ կազմակերպել կամ մասնակցել հաւաքական այնպիսի ծրագրերի, որտեղ բարձր էին պահպանել հայկական արւեստն, ու դրա դարաւոր անցեալի հանդէպ տեղացի ժողովրդին մօտ յարգանք էին ստեղծել:
Վերջապէս, Մեղմիկ Ոսկանեանի հրաւէրով, հերթաբար բեմ բարձրացան հայ երիտասարդ-երիտասարդուհի համալսարանականներ, քաջալերական արձանագրութեամբ պղնձեայ յատուկ յուշատախտակներ ստանալու:
Իր պատգամում, Սրբազան Հայրը առաջին հերթին վեր առաւ Համալսարանականների միութեան բարձրարժէք հաւաքը: Նա շեշտեց, որ նման առիթները հարստացնում են թեմը, հին ու նոր զարգացած սերունդների ուժական ներկայութիւնը համակարգելով: Սրբազանը իր խօսքը շեշտադրելով ուսումնական կեանքի նախօրեակին, ասաց, թէ մանկական տարիքի առաջին քայլերից՝ մանկապարտէզից է սկսւում կրթութիւնն ու դաստիարակութիւնը. «Բոլոր համալսարանականները, եւ ուսման ու գիտութեան մէջ յաջողութիւնների հասած անձերը իրենց կրթութիւնը սկսել են մանկապարտէզից: Հետեւաբար իւրաքանչիւր կրթօջախ ունի իր տիրական դերակատարութիւնը, որի բարեբեր աշխատանքի ընթացքով, երեխան մեծանում, զարգանում է ուսման մէջ եւ մի օր էլ համալսարանական ուսումնառութեամբ բարձր դիրքերի հասնում»: Նա շեշտեց համայնքի բոլոր զաւակների բարձր ուշադրութեան կարեւորութիւնը, թեմի բոլոր կրթօջախների նկատմամբ:
Յայտնենք, որ վարչութեան տնօրինութեամբ, բոլոր ներկաները հիւրասիրւեցին, իսկ երեկոն փակւեց հաւաքական լուսանկարով, եւ ներկաների անհատական շնորհաւորանքներով, բոլոր գնահատւողներին:
