Ատրպատականի հայոց թեմի առաջնորդը դատապարտեց Օլիմպիականի կրօնական անարգանքը
«ԱԼԻՔ» – Ատրպատականի ազգային առաջնորդարանից տեղեկանում ենք, որ Օլիմպիական խաղերի բացման արարողութեան ընթացքում, քրիստոնէական կրօնը, եւ մասնաւորապէս Յիսուսի «Խորհրդաւոր ընթրիք»-ը պատկերող կտաւը ծաղրելու կապակցութեամբ, Ատրպատականի հայոց թեմի առաջնորդ Տ. Գրիգոր արք. Չիֆթճեանը հանդէս է եկել դատապարտող յայտարարութեամբ:
Յայտարարութեան մէջ մասնաւորապէս նշւած է.
«Աստւածային կրօնների դերը համամարդկային կեանքում իր իւրայատկութեամբ, դաստիարակչական բնոյթ է կրում: Ուստի, ներկայ կեանքի անորոշութեան դառն պայմաններում, քաղաքական վտանգալից ժամանակահատւածում, երբ պաղեստինցի ժողովրդի կոտորածը շարունակւում է, միւս կողմից քրիստոնէական կրօնի հանդէպ անարգանքը գալիս է նոր տագնապ առաջացնելու, առանց այն էլ տագնապալից կացութիւնում, կոչ ենք են ուղղում միջազգային ընտանքի պատասխանատուներին, դատապարտել կրօնական սրբութեանց հանդէպ, որպէս թէ ի պաշտպանութիւն սեռական փոքրամասնութեանց կատարւած սոյն կեցւածքը: Արեւմտեան աշխարհը լաւ է իմանում, թէ մէկի ազատութիւնը, միւսի ազատութիւնը չի կարող արգելել: Առաւել եւս, կրօնական ազատութիւններ եւ զգայնութիւններ կարելի չէ վիրաւորել: Այսու, Ատրպատականի հայոց թեմի անունից խստիւ դատապարտում ենք կրօնական սրբութիւնների հանդէպ վերոյիշեալ անյարգալից մօտեցումը, եւ քաղաքակիրթ աշխարհից պահանջում՝ յարգալից վերաբերմունք ցուցաբերել բոլոր կրօնների նկատմամբ»:
