Ատրպատականի հայոց թեմի առաջնորդը ընդունեց Արդաբիլի հնապահպանութեան տնօրէնին

Ատրպատական, ազգային առաջնորդարան, Թաւրիզ – Երեքշաբթի՝ հոկտեմբերի 29-ի առաւօտեան ժամը 11:00-ին, Ատրպատկանի հայոց թեմի առաջնորդ՝ Տ. Գրիգոր արք. Չիֆթճեանը ազգային առաջնորդարանի «Էմիլ Յակոբեան» դահլիճում ըն­դու­նեց, Իրանի Արդաբիլ նահանգի հնապահպանութեան ընդհանուր տնօրէն՝ Հասան Մոհամմադի Ադիլի պաշտօնական այցելութիւնը: Նրան ընկերակցում էր ճարտա­րապետ Մոջթապահ Ջաւան Աջեդատը՝ հնութիւններ համախմբող խմբի տնօրէն: Սոյն հան­դիպ­մանը ներկայ էին Ատրպատականի հայոց թեմի Թեմական խորհրդի անդամներից՝ ատենապետ Գագիկ Ջորջեանը, Ալէն Սայեադեանը, Հենրիկ Աբրահամեանը, եւ ատենադպիր՝ Վարդան Կա­րա­պետեանը:

Նշենք, որ շուրջ կէս տարի առաջ, Ատրպատականի հայոց թեմի Թեմական խորհրդի մեծ ի­րագործումներից հանդիսացաւ, Արդաբիլի հայոց Ս. Աստւածածին եկեղեցու փրկու­մը, տեղին տիրացած մարզական հնամեայ արւեստի մի խմբից, թե­մի կողմից բացւած դատական հայցի արձանագրած յաջողութեամբ:

Առաջնորդ Սրբազան Հայրը ողջունելով ներկաներին, Իրանի կրօնական հովանաւո­րութիւն վայելող երկրի պայմաններում ստեղծւած սխալին վերանայել տւեց հիւրերին, յիշեցնելով, որ Աստծու տները աղօթքից բացի կարող են միայն թանգարանային իրա­վիճակ ստանալ, երբ այլեւս իրենց շրջապատում նոյն կրօնին պատկանող հաւատաց­եալներ չունեն:

Ընդհանուր տնօրէնը վերահաստատելով Սրբազան Հօր բացատրութիւնը, նշեց որ Հնապահպանման պետական հիմնարկութեան տնօրէնութիւնը, ինչպէս նաեւ Ար­դա­բիլի աղօ­թա­պետը միշտ պատրաստ են լաւագոյնը մատուցելու հայերի թողած պատմութեան եւ մշակութային ժառանգութեանը: Նա նշեց, որ մինչեւ այսօր քաղաքի կենտրոնական մասերից մէկում գտնւող հայոց եկեղեցու լայն պողոտան կոչւում է «Էրմանիստան» (Հայաստան), երբ նոյնիսկ ո՛չ մի հայ չի՛ ապրում յիշեալ քաղաքում:

Հասան Մո­համ­մադի Ադիլի յատուկ հրաւէր տւեց Սրբազան Հօրը եւ Թեմական խորհրդին, մօտ ապագայում հանդիպում ունենալու Արդաբիլում, տեղում վերոյիշեալ ծրագրերին որոշումներ կայացնելու համար:

Ատրպատականի հայոց թեմի Թեմական խորհրդի անդամները, սկսեալ ատենապետից, գործնական քայլերի մասին արտայայտւեցին, յատկապէս յիշելով օրինական բոլոր միջոցները, հայոց եկե­ղեցու դարաւոր անցեալի յիշատակութեան եւ բոլոր այցելուներին ներկայացնելու առաջիկայ աշխատանքներում:

Պետական հիւրերը առիթ ունեցան նաեւ այցելութիւն տալու Թաւրիզի ազգային ա­ռաջնորդարանի «Ռոստոմ Գասպար» գրադարան, որը վերանորոգութեան ենթարկւե­լով փայլուն իրավիճակ է ստացել: Նրանք նաեւ ականատես դարձան առաջնորդարա­նում պահպանւած հնատիպների բաժանմունքի բծախնդիր վերանորոգման ու վերադասաւորմանը, այս մասին առաջնորդ Սրբազան Հօր լայն բացատրութիւնները լսե­լով: Նոյն առիթով, Սրբազանը իր հեղինակած եռահատոր մատենաշարից նւիրեց հիւ­րերին, որոնցով գրել էր թեմի բոլոր եկեղեցիների պատմութիւնը: